Археолози од Оксфорд веруваат дека ја пронашле, досега, најстарата жртва на напад од ајкула. По детален преглед било утврдено дека на коските има многу длабоки и нерамни лузни од бројни гризнувања од ајкула.

Научниците работеле на скелет кој го добиле од Универзитетот Кјото, Јапонија. Според нив човекот претрпел над 800 повреди кои биле длабоки и сериозни и во извештајот се наведува дека откако бил нападнат неговото тело останало во водата и од него се хранеле ајкулите.

Ова тело било најдено во една гробница заедно со остатоци од уште 170 тела. Но само на него имало вакви сериозни повреди на карлицата, левата нога, рамената и едната рака, додека левата рака и десна нога ги немал.

Се претпоставува дека бил нападнат од тигар-ајкула или голема бела ајкула кои се најчестите жители во Јапонското море.