Најскапиот стан во Србија е продаден за 1,2 милиони евра, а најскапата куќа за 3,18 милиони евра
Во Србија во првиот квартал од годинава е продаден најскапиот стан во белградската општина Врачар, по цена од 1,22 милиони евра, соопшти Републичкиот геодетски завод на Србија. Најскапата куќа е продадена во белградската општина Савски Венац за 3,18 милиони евра. На Врачар е продаден и најскапиот стан по метар квадратен во првиот квартал од 2024 година. Тој чинел цели 10.350 евра, се наведува во соопштението.
Препорачано
Најскапо платен гаражен простор во првите три месеци од годинава е гаражниот простор во Врачар, за кој биле платени 73.000 евра, додека најскапата цена за деловен простор изнесува 3,09 милиони евра и е платена во општина Савски Венац, исто така во Белград.
Вкупниот износ на пари за купување недвижен имот во Србија во првите три месеци од годинава изнесува 1,5 милијарди евра, што е за 2,6 отсто помалку во однос на истиот период од претходната година, објави РГЗ.
Како што се наведува, од вкупно 1,5 милијарда евра, 456 милиони евра се од делумно регулираниот пазар, односно продажба на недвижности што не се запишани во катастарот на недвижности. Најголемо учество во вкупниот промет на недвижности има продажбата на станови (834 милиони евра), со учество од 56 отсто од вкупната истргувана вредност.
За куќи се издвоени 122,5 милиони евра, што е осум отсто од вкупната вредност, за градежно земјиште 114,6 милиони евра или осум отсто од вкупната вредност, за деловен простор 72,6 милиони евра или пет отсто од вкупната вредност, а за земјоделско земјиште 64, 6 милиони евра, што е четири отсто од вкупната вредност.
Во извештајот стои дека седум отсто од сите тргувани недвижности се плаќале од кредити, што е за еден процент помалку од лани. Најголем обем на средства е забележан на подрачјето на Првиот основен суд во Белград и изнесува 359 милиони евра.
Канцеларија на еден нотар од подрачјето на истиот суд, евидентирала најголем обем на средства во износ од околу 72,9 милиони евра од 377 склучени договори, од кои околу 48,6 милиони евра и 221 договор припаѓаат на делумно регулираниот пазар.
Најголем број купопродажни договори на пазарот на недвижности, поднесени од нотари, се склучени на подрачјето на Основниот суд во Нови Сад, додека најголем број договори се склучени во канцеларија исто на еден нотар од подрачјето на тој суд: 475 од вкупен износ од 42,7 милиони евра.
