Дијамантот „Сина кралска“ (Blue Royal) во облик на круша од 17,61 карати достигна продажна цена од 43,8 милиони долари.

Тоа е „најголемиот живописен син скапоцен камен“ кој некогаш се појавил на продажба во историјата на аукциите, велат од „Кристис“, пренесува „Би-би-си“.

Дијамантот бил во приватна колекција 50 години.

Најголемиот син дијамант беше ставен на аукцијата за ретки скапоцени камења во Женева на 7 ноември, соопштија од аукциската куќа „Кристис“.

Овој живописен син дијамант е еден од најретките откриени досега.

„Она што го прави „Blue Royal“ толку редок и посебен е неговата големина. Со 17,6 карати, тој е најголем од ваков вид“, рекол Рахул Кадакија, меѓународен шеф за накит на „Кристис“.

Во 250-годишната историја на аукциите, на продажба се појавија само три фенси живописни сини дијаманти над 10 карати.

„Исклучително сме задоволни“, изјави за АФП Макс Фосет, шеф за накит на „Кристис“ во Женева, додавајќи дека тоа е „најскапото парче накит продадено од која било аукциска куќа во светот во цела 2023 година“.

Аукциската куќа „Кристис“ во 2016 година продала редок син дијамант од 14,6 карати познат како „Опенхајмер син“ (Oppenheimer Blue) за повеќе од 57 милиони долари.

„Кристис“ во понеделникот го продаде часовникот „Ролекс“ што го носеше американскиот актер Марлон Брандо во филмот „Апокалипса сега“ за околу 5 милиони долари. На задната страна на часовникот е рачно изгравирано „М. Брандо“.

„Кристис“ спроведува онлајн продажба на бисерниот ѓердан што го носеше Одри Хепберн во последната сцена од филмот „Празник во РИм“. Продажбата се одржува до 16 ноември.