Комесарот на НБА лигата, Адам Силвер, во последните две години најави дека најсилната кошаркарска лига ќе се прошири, а последен кој пројави интерес е најпознатиот кошаркарски клуб на светот, Харлем Глобтротерс.
Легендарниот клуб постои од 1926 година и е познат по своите егзибициски натпревари, има одиграно околу 26.000 средби и тоа во 124 држави во светот, а меѓу нив е и Македонија.
Иако Харлем е познат по ревијалните натпревари, во тимот сметаат дека можат да соберат доволно квалитетен тим кој би можел да игра во НБА лигата.
„Во однос на тоа што го направивме и на нашата популарност и препознатливост, како и бројот на професионалци кои играле за нас, сметаме дека заслужуваме шанса. И тоа веднаш“, стои во дел од писмото кое од Харлем го упатија до комесарот Силвер.