Најпознатата недовршена зграда во светот конечно ќе биде завршена во 2026 година, точно 100 години по смртта на нејзиниот творец, архитектот Антони Гауди. Станува збор за монументалната базилика „Саграда Фамилија во Барселона“, чија работа напредува секој ден, а по завршувањето ќе стане највисоката сакрална зграда во Европа.

Саграда Фамилија, симболот на Барселона, е во изградба веќе 143 години. Изградбата започнала во 1882 година, а Гауди набрзо го презел проектот и радикално го променил дизајнот. По неговата смрт во 1926 година и Шпанската граѓанска војна, работата стагнирала и многу од оригиналните дизајни и модели на Гауди биле уништени- пренесе Каматица.

Денешните работи се базираат на реконструирани планови, а на официјалната веб-страница на зградата е потврдено дека црквата ќе биде завршена во 2026 година. Работата напредува од ден на ден, а неодамна два дела што ќе го формираат јадрото на крстот за централната кула на Исус Христос пристигнаа во базиликата. Овие делови беа транспортирани 54 метри над земјата, каде што наскоро ќе бидат склопени. Се очекува останатите делови од крстот да пристигнат во текот на август, а работата на нивното склопување и поставување на стакло и други детали ќе продолжи до крајот на 2025 година.

Јадрото на крстот ги поврзува сите краци на кулата, кои по завршувањето ќе ги содржат и скалите што водат до таа област. Во јуни започнаа работите и на фасадите на капелата „Успение на Богородица“, вклучувајќи скулптури изработени од три избрани уметници: Мерсе Риба, Беатрис Бизо и Тереза ​​Риба.

Во „Саграда Фамилија“, Гауди го комбинирал готскиот стил со заоблени линии, јасноста и едноставноста на модернизмот, со амбициозна структура од столбови и лакови. Црквата има внатрешна должина од 90 метри и ширина од 60 метри. Има три фасади (Раѓање Христово, Страст и Слава) со по четири камбани на секоја.

Долго време, изградбата зависела исклучиво од донации и приходи од билети. Гауди бил свесен дека процесот ќе биде долг; во времето на неговата смрт, само 20 проценти од работата била завршена.

Најинтересниот факт е дека Ла Саграда Фамилија била градена 137 години без важечка градежна дозвола. Дури во 2016 година градските власти утврдија дека базиликата никогаш немала дозвола и дека била изградена „нелегално“ од самиот почеток.

Базиликата конечно ја доби својата формална градежна дозвола на 6 јуни 2019 година. Фондацијата задолжена за изградбата, „The Junta Constructora del Temple Expiatori de la Sagrada Família“, плати дури 4,6 милиони евра за дозволата.

По завршувањето, базиликата ќе има вкупна површина од 41.000 квадратни метри и вкупно 18 кули: 12 посветени на апостолите и споменатата централна кула на Исус Христос, висока 172,5 метри со крст на врвот.