Во употреба е пуштен нов парк кој се наоѓа до Сити мол и е негова донација за најмладите жители на Карпош. Паркот, лоциран на аголот помеѓу булеварот Партизански одреди и улицата Љубљанска, се протега на површина од над 850 метра квадратни, а во него се поставени модерни детски реквизити и просторот е хортикултурно уреден со висококвалитетни садници, цвеќиња, зеленило и реквизити.

Како што информираат од Општина Карпош, во овој урбан простор ќе има и летна отворена тераса, каде можат да се организираат помали настани и да се социјализираат граѓаните. Целосното уредување на паркот е инвестиција на Скопје Сити Мол вредна околу 500.000 евра, а новоуредениот простор е во сопственост и владение на Општината.

 Главна атракција во рекреативниот парк е игралиштето кое е изградено според светските трендови со специјално дизајнирана кула за качување, која нуди широк спектар на возбудливи активности за најмладите граѓани. Качувалката којашто е висока 8,5 метри е изградена според најсовремените европски стандарди, составена од сложени форми, кои се поставени во облик на структурата на ДНК – велат од Карпош.

Оттаму објаснуваат дека во моментов ширум Европа, расте трендот на создавање на игралишта од овој тип, бидејќи тие влијаат на развојот на психомоторните функции кај децата, по примерот на стимулирање на качување на дрвја.