Израел изврши големи напади врз цели поврзани со Хутите во Јемен, објави денес израелската армија, при што загинаа најмалку две лица, според проиранската бунтовничка група.

Израелските воздухопловни сили нападнаа воена цел недалеку од претседателската палата во Сана, објави армијата на Телеграм. Други цели беа две електрани и складиште за гориво што го користеа Хутите, според армијата. Армијата објави дека бранот напади е одговор на нападите на Хутите врз Израел, од кои последниот беше извршен завчера.

Израелската воздушна одбрана ги пресретна тие ракети, според војската. Најмалку две лица загинаа, а 35 беа повредени во „ционистичките“ воздушни напади врз Сана, објави Министерството за здравство на Хутите.

Во нападите учествуваа повеќе од 10 израелски авиони

Според министерството, нападнати се инфраструктура и цивилни цели. Очевидци во Сана рекоа дека слушнале гласни експлозии. Некои од погодените енергетски цели, вклучувајќи електрана и објект за складирање гориво, биле користени за цивилни цели, соопшти министерството.

Во нападите учествувале повеќе од 10 израелски воени авиони, соопштија израелски воени извори. Целите биле оддалечени до 2.000 километри од израелската граница, па авионите неколку пати се полнеле со гориво во воздух.

Денес, Израел ги обвини Хутите дека „веројатно“ за прв пат користеле касетна муниција во нивниот последен напад врз Израел.

„Ова е прв пат таква ракета да биде лансирана од Јемен. Сепак, важно е да се напомене дека воздушната одбрана на Израел може да се справи со овој вид муниција“, објави армијата.

Хутите го нападнаа Израел завчера

Хутите објавија завчера вечерта дека започнале нов напад врз меѓународниот аеродром во близина на Тел Авив. Ракетата, според израелската војска, се распаднала во воздух пред да ја достигне целта. Дел од ракетата наводно паднал во близина на аеродромот.

Според Амнести Интернешнл, Иран користел и касетна муниција во својот одговор на израелските напади во јуни. Таа муниција е забранета според меѓународното право, според ОН.