Министерството за здравство на палестинските власти објави во четвртокот вечерта за смртта на двајца Палестинци од израелски оган во Џенин, во северниот дел на окупираниот Западен Брег, каде што крвавите инциденти се практично секојдневни.

Во соопштението на Министерството се наведува дека двајца мажи „чии идентитети се уште не се познати“ биле убиени „со окупациски куршуми во бегалскиот логор Џенин. Во истиот град завчера, среда, беше убиен уште еден маж.

Израелската армија вчера соопшти дека војникот, 20-годишниот наредник Лијам Хаџи, припадник на извидувачки баталјон, „паднал за време на операција“, а еден колега е тешко повреден.

Весникот „Тајмс оф Израел“ објави дека подофицерот бил убиен за време на размена на оган со палестинските милитанти во Џенин.

Во меѓувреме, палестинските медиуми јавија дека 42-годишен маж бил убиен вчера од израелски оган во Наблус, исто така во северниот дел на палестинската територија, а неговата сопруга е повредена.

Израелската армија спроведува голема операција во областа Џенин и соседниот бегалски камп, која сега е во десетти ден.

Во срцето на операцијата за време на раните денови на „Железниот ѕид“, како што се нарекуваше операцијата, целта беа палестинските борци поврзани со движењето Хамас и палестинскиот Исламски џихад.

Израелскиот министер за одбрана Израел Кац најави дека армијата ќе остане во градот и по завршувањето на операцијата, за да „гарантира дека тероризмот нема да се врати“, предизвикувајќи бурни реакции.

И израелските вооружени сили потврдија дека завчера, среда, убиле „десет терористи“ во воздушен напад врз селото Тамун, во областа Тубас, југоисточно од Џенин.

„За време на заедничка операција на армијата и Шин Бет (внатрешна безбедносна и разузнавачка служба), беспилотни летала на воздухопловните сили нападнаа група вооружени терористи во областа Тамун“, се наведува во текстот, во кој се тврди дека двајца од загинатите биле вклучени во напад со експлозив на 20-ти јануари, кој резултираше со смрт на израелски војник.

Палестински извори претходниот ден веќе го објавија бомбардирањето и дека загинале десет лица. Хамас ја осуди „ескалацијата на злосторствата на фашистичката окупација на Западниот Брег и тековната политика на убивање херојски членови на отпорот и муџахедините“.

Насилството брзо ескалира на Западниот Брег, област под израелска окупација од 1967 година, откако изби војна меѓу Хамас и израелската армија во Појасот Газа на 7 октомври 2023 година.

Оттогаш најмалку 876 Палестинци ги загубија животите таму во операции на израелската армија или напади на доселеници, според податоците на Министерството за здравство на палестинската управа.

Од друга страна, според официјалните израелски податоци, најмалку 30 Израелци ги загубиле животите, или во палестински напади или во непријателства за време на операциите во истиот период.