Трилече е колач кој кај нас стана многу популарен во последните неколку години, многу е едноставен за приготвување, а со вкусот ги освои сите. Важна работа е и дека им успева и на нејнеискусните домаќинки и воопшто не ви се потребни многу пари за овој деликатес.

За потеклото на овој колач, чие име во превод значи „три млека“, многумина и понатаму дебатираат, некои тврдат дека потекнува од Јужна Америка, други од Мексико, се споменуваат и Албанија и Турција…

Но, во едно сите се согласуваат – вкусот на овој деликатес е божествен.

Oвој рецепт ќе го направите многу брзо и без мака, а колачот уште побрзо ќе исчезне од трпезата, бидејќи никој не може да застане на едно парче.

Состојки:

– 5 јајца
– 9 лажички шеќер (140 грама)
– 13 лажици брашно (220 грама)
– 12 грама прашок за печиво
– 1 литар + 200 мл млеко
– 600 мл слатка павлака
– 500 грама карамела

Подготовка:

Јајцата и шеќерот сипете ги во сад и добро изматете со миксер, па додајте брашно и прашок за печиво и рачно измешајте со жица – маталка.

Добиената смеса сипете ја во подмачкан плех и печете во загреана рерна на 250 степени на следниот начин: печете ги првите пет минути на оваа температура, а потоа намалете и следните 25 минути печете на 180 степени, но внимавајте да не се препече.

Додека смесата се пече, подгответе го преливот – соединете ги млекото и слатката павлака и убаво измешајте.

Кога тестото ќе се испече, оставете го да „одмори“ пет минути и избоцкајте го со чепкалка за заби. Потоа прелијте го со млекото и премачкајте го со карамела.