Лидерот на британската десничарска Реформска партија, Најџел Фараж, денес изјави дека во својот прв мандат, доколку победи на изборите, ќе депортира до 600.000 нелегални мигранти доколку победи на следните парламентарни избори.

Зборувајќи во хангар во Оксфордшир, Фараж ја претстави „Операција правда“ – план за масовни депортации, пишува Телеграф.

Тој план предвидува изградба на центри за притвор на воени локации за сместување на 24.000 луѓе, што би било завршено во рок од 18 месеци од преземањето на функцијата.

Фараж, исто така, најави законски измени, вклучително и напуштање на Европската конвенција за човекови права, укинување на Законот за човекови права и привремено суспендирање на примената на Конвенцијата за бегалци за пет години.

Тој изјави дека постои „вистинска закана за јавниот ред“ ако политичарите не преземат мерки против нелегалната имиграција.

Планот, исто така, вклучува обид за постигнување договори за враќање со земји како Авганистан и Еритреја, со планиран финансиски стимул од 2 милијарди фунти за странските влади да ги прифатат вратените мигранти.

Фараж  ги обвини британската и француската влада за „договор во поддршката на криминалните активности“ како одговор на преминувањата со мали чамци.

„И покрај 925-те милиони евра што им ги дадовме на Французите, француските воени бродови ги следат овие чамци до линијата од 20 километри каде што ги собираат Граничните сили или нашите волонтери. Се случува Французите да им дадат на сите елеци за спасување, а кога Граничната полиција ги собира, им ги враќаат елеците за спасување на Французите за да можат повторно да ги користат на следното патување. Мислам, буквално сме сведоци на две влади кои се заговараат за поддршка на криминални активности“, рече тој.

Во својот говор, Фараж најави серија строги мерки за имиграција што неговата партија ќе ги спроведе доколку тој дојде на власт, пишува Скај њуз.

Тие вклучуваат укинување на Законот за човекови права на Велика Британија од 1998 година и привремено повлекување на Велика Британија од Конвенцијата од 1951 година за статусот на бегалците – за период од пет години.

Тој, исто така, најави укинување на сите законски „бариери“ за депортација што, како што тврди, ги користат адвокатите за „заштита на нелегалните мигранти“, како и воведување законска обврска за министерот за внатрешни работи да ги притвори и депортира сите што нелегално влегуваат во земјата.
Фараж рече дека таквата политика би „ги запрела бродовите за неколку дена“ и би ја направила помалку привлечна за мрежите за трговија со луѓе.

Освен безбедносните и миграциските прашања, лидерот на Реформската партија тврди дека мерките на неговата партија потенцијално би можеле да заштедат стотици милијарди фунти до 2034 година.
Иако Реформската партија бележи зголемување на поддршката во анкетите на гласачите, таа моментално има четири пратеници во британскиот парламент од вкупно 650 пратеници.