Најбогатиот човек во Франција, Бернар Арно, го критикуваше предлогот за воведување данок за богатите во Франција во износ од два проценти, што би му одзело повеќе од милијарда евра.

Сопственикот на луксузниот конгломерат LVMH во интервју за Sunday Times изјави дека овој данок би имал катастрофални последици за француската економија и би можел да придонесе за уништување на либералната економија „единствената што работи во корист на сите“. Богатството на Бернар Арно се проценува на приближно 133 милијарди евра.

Мнозинството гласачи во Франција, повеќе од 80 проценти, го поддржуваат овој данок, чиј автор е економистот Габриел Зукман.

„Невидената концентрација на богатство и неограничената моќ што доаѓа со неа ја нарушија нашата демократија и ги поттикнаа социјалните и економските тензии“, вели Зукман. Тој проценува дека данокот, кој би се применувал на средства што надминуваат 100 милиони евра, би можел да собере дополнителни 20 милијарди евра за францускиот буџет, објавува „Гардијан“.

Критичарите предупредуваат дека најбогатите Французи би можеле да ја напуштат земјата поради високите даноци, па затоа ефектот врз даноците би бил многу помал од очекуваното, само 5 милијарди евра.