Цената на станбениот квадрат нема да биде 1.792 евра, туку 1.912, а оние помлади од 45 години кои ќе го купат својот прв имот ќе добијат 50 отсто поврат на данокот. Во тек е и програма за изнајмување на станови кои неколку години се празни со поволна цена. Како што објаснуваат од хрватското Министерство за просторно планирање, градежништво и државен имот, преку програмата за социјално поттикнување домување (ПОС) се изградени 9.126 станови во 296 згради во 83 единици на локалната самоуправа, а во тек е подготовка на уште 732 станови во 18 градови.

Минатата година, пак, не е изграден ниту еден ПОС-стан, а токму тоа е една од причините поради која се менува законот, пренесува Вечерњи лист.

„Во досегашната имплементација на ПОС Програмата, забележани се значителни отстапувања во просечните продажни цени на новите станови, градежните цени, цените на земјиштето и цените на општинските инфраструктурни уредувања и инфраструктурни приклучоци постигнати во ПОС во однос на просечните цени постигнати на пазарот, односно во однос на просечните продажни цени на становите на фирмите и другите правни лица без ПОС. Според билтенот подготвен од Институтот ИГХ за Министерството за просторно планирање, просечниот трошок за градба од 2019 до 2023 година пораснал за повеќе од 50 отсто“, велат од Министерството, истакнувајќи дека цените на недвижностите континуирано растат од 2016 година, објави Н1 Хрватска.