Синоќа беа доделени престижните награди од изборот на филмските критичари за 2024 („Critics’ Choice Awards“) во Санта Моника, Калифорнија. На годинашното доделување на наградите, филмот „Опенхајмер“ на режисерот Кристофер Нолан освои осум награди, меѓу кои и оние за најдобар филм, споредна машка улога, најдобра режија, најдобра монтажа, најдобри визуелни ефекти, најдобра актерска екипа и најдобра кинематографија.

Главниот актер Килијан Марфи овој пат остана без награда, а Роберт Дауни Џуниор ја доби онаа за најдобра споредна машка улога. Филмот „Барби“ на Грета Гервиг доби шест награди и тоа за оригинално сценарио, оригинална песна (“I’m Just Ken“), најдобра комедија, најдобра продукција, најдобри костими и најдобра шминка и фризури.

Актерката Ема Стоун е прогласена за најдобра актерка во филмот „Кутри нешта“ во режија на Џорџ Лантимос, а најдобар актер оваа година е Пол Џамати за улогата во филмот „Оние што остануваат“.

Кога станува збор за телевизиските награди, како најдобри серии се истакнаа „Наследници“, „Кавга“ и „Мечката“.

Славниот актер Харисон Форд беше ѕвезда на вечерта на доделувањето на наградите, каде што беше одликуван со награда за достигнувања во кариерата.

Кога излезе на сцената да се заблагодари за признанието, 81-годишниот актер доби овации од публиката, а потоа беше пуштено видео во кое се прикажани неговите најголеми филмски достигнувања. Харисон во краток емотивен говор и солзи во очите ѝ се заблагодари на 22 години помладата сопруга Калиста Флокхарт за безрезервната поддршка.

Филмските награди од изборот на критичарите ги доделува Американско-канадското здружение на филмски критичари за да им оддаде почит на најдобрите филмски остварувања на годината.