Цените на нафтата на меѓународните пазари денеска се искачија над 62 долари, водени од надежите на трговците дека Кина и САД ќе ги намалат трговските тензии и ќе ја отстранат заканата за глобалната економија и побарувачката на енергенси, пренесе „Ројтерс“.

На лондонскиот пазар цената на барелот по пладнето беше повисока за 1,26 долари отколку на затворањето на претходниот трговски ден и изнесуваше 62,38 долари. Вчерашното тргување го затвори во минус од 1,03 долари.

На американскиот пазар со барелот денеска се тргуваше по цена повисока за 1,35 долари, на 59,42 долари. Вчера тргувањето заврши во минус 1,02 долари.

Организацијата на земјите извознички на нафта (OPEC) засебно објави дека барелот од референтната нафтена кошничка на нејзините членки во средата поскапел за 1,06 долари на 62,87 долари.

Во средата пазарите реагираа претпазливо на најавата за трговски разговори меѓу САД и Кина во Женева. Американскиот министер за финансии Скот Бесент и главниот трговски преговарач Џејмисон Грир ќе се сретнат со кинескиот вицепремиер Хе Лифенг во Женева во сабота за да разговараат за трговијата, соопшти Вашингтон, а кинеското Министерство за трговија ја потврди информацијата.