Состојбата е стабилизирана во процесот на вакцинација на населението против ковид-19, тврдат надлежните од Здравствениот дом Скопје, откако вчера повозрасни граѓани се пожалија дека чекале со часови на вакциналните пунктови во поликлиниките „Букурешт“ и „Јане Сандански“ во Скопје.

Директорот на Здравствениот дом Скопје, доктор Виктор Исјановски, за „Слободен печат“ тврди дека посериозни застои на овие пунктови немало, туку дека станува збор за поголем број закажани термини од вообичаено, а и вакцината на производителот „Фајзер-Бионтек“ бара нејзино одмрзнување и аплицирање шест дози од едно пакување што го забавило процесот. Освен тоа, како што тврди Исјановски, некои граѓани доцнат на закажаниот термин и се случува ,,совпаѓање“ со терминот на пациентот кој е следен на ред, но ситуацијата на терен успешно се менаџира.

Некогаш граѓаните доцнат, па термините се совпаѓаат

– Застој во вакцинација воопшто немаше. Потребно е малку повеќе време, бидејќи се администрира вакцината на „Фајзер“, а од неа, како што е познато, од една вијала се вадат шест дози. Тоа мора да биде пофлексибилно, не може за пет минути. Термините се закажуваат преку „Мој термин“. Во пунктот „Букурешт“ имаше 560 термини, некогаш граѓаните доцнат, па се совпаѓаат со тие што се точни. Меѓутоа, застој немаше – дециден е д-р Исјановски.

Од Министерството за здравство велат дека сите закажани граѓани биле вакцинирани. На оние што не сакале да почекаат околу 20 минути, колку што траел застојот, им било понудено да бидат пренесени до Спортскиот центар „Борис Трајковски“.

Граѓаните се пожалија дека иако имале уредно закажан термин и иако се возрасни над 70 години, имало застој од неколку часови. Според надлежните, проблемот е надминат и не се очекува да се повтори. Моментно на споменатите два пункта се дава вакцината на производителот „Фајзер-Бионтек“.

Според националниот план за имунизација, во моментов се вакцинираат граѓани повозрасни од 70 години. Викендов се очекува да пристигне голема количина на кинески вакцини, околу 200 илјади дози, со што капацитетот за имунизација значително ќе се зајакне.

Министерот за здравство Венко Филипче, коментирајќи ја состојбата на вакциналните пунктови, рече дека имало недоразбирање и застој поради термините, но дека проблемот е надминат.

– Имаше таква информација за граѓани во вакциналните пунктови „Букурешт“ и „Јане Сандански“, станува збор за недоразбирање околу термините, проблемот е решен и нема да се случува во иднина. Во врска со турканиците, има предвидено доволно простор за да не се создаваат и да се чека на растојание. Оваа слика може да се смени со пуштање во употреба на пунктовите за масовна вакцинација, кои ќе профункционираат во вторник – вели Филипче.

Досега се вакцинирани повеќе од 60 илјади граѓани

Тој додаде дека в понеделник насекаде ќе бидат дистрибуирани кинеските вакцини, во согласност со бројот на пријавени граѓани. Ќе започне вакцинирањето во големи сали и во Тетово, Куманово, Битола, Штип и во Охрид.

– Ќе биде систем со кој ќе се овозможи да се вакцинираат и повеќе од 10 илјади граѓани и да нема турканици. Вкупно досега се вакцинирани повеќе од 60 илјади граѓани повозрасни од 70 години и вработени во критичната инфраструктура – рече Филипче.

Според последните најави, треба да пристигнат и вакцини од системот на солидарност од Европската Унија преку Австрија. Вкупно 200 илјади вакцини, на 30 април, преку Истанбул и Белград, треба да стигнат во Скопје.

– По Велигден следува забрзана вакцинација со кинеските вакцини и верувам дека тоа ќе ја смени сликата за епидемијата кај нас – вели министерот Филипче.

Приоритет и предност ќе им биде даден на граѓаните што се веќе пријавени на сајтот вакцинација.мк, меѓутоа според нивната возраст, а не според коморбидитетите.

Состојбата со пандемијата се смирува и епидемиолошката ситуација укажува на тоа, меѓутоа, министерот додаде дека масовните собирања во верските објекти за време на претстојните верски празници се можност за прекршување на мерките и препораките и побара свест и совест од граѓаните за да се даде придонес епидемијата да спласнува.