Повеќе од 90 лица загинаа во потонувањето на брод со мигранти крај брегот на Јемен во неделата, соопштија јеменските власти и портпаролот на Меѓународната организација за миграција (ИОМ).

Бродот, кој превезувал претежно Етиопјани, потонал додека пловел кон јужната јеменска покраина Абјан, популарна дестинација за криумчари кои превезуваат мигранти со надеж дека ќе стигнат до богатите монархии во Персискиот Залив.

Се очекува бројот на жртви да се зголеми бидејќи, според ИОМ, на бродот што потона имало 157 лица. Во претходниот извештај на јеменските безбедносни сили се споменуваат 76 мртви и 32 спасени.