Во земјава е многу лесно да се аплицира и да се земе „брз“ кредит од финансиските друштва. Поради едноставноста на постапката за аплицирање на овие кредити висок е и бројот на злоупотреби. Често полицискиот билтен е полн со случаи каде измамници со туѓи лични карти подигаат брзи кредити, а оштетените не се ни свесни за тоа сè додека не им стигне известување дека не ја платиле ратата.

Од МВР за „Слободен печат“ информираат дека годинава, заклучно со јули, евидентирани се 65 случаи на злоупотреба на лични податоци.

„Заклучно со месец  јули во Министерството за внатрешни работи се пријавени 65 случаи на злоупотреба на лични податоци односно, аплицирање и одобрување на брзи кредити со туѓа лична карта. За овие случаи до ОЈО поднесени се девет кривични пријави и 30 писмени известувања, велат од МВР.

Злоупотребите со брзите кредити до јули месец се за една четвртина поголеми во однос на цела година лани кога за дванаесет месеци имало пријавени 43 случаи на измами.

„Минатата година евидентирани се 43 случаи на измами со брзи кредити со кои по преземени мерки и активности до надлежните ОЈО поднесени се 16 кривични пријави и 24 писмени известувања, при што во рамките на расветлените случаи пријавени се 24 сторители и поднесено е едно известување до оштетено лице за поднесување на приватна тужба против откриен сторител“, информираат од МВР.

Според анкетата на ИПИС, направена во мај, 80,3% од граѓаните велат дека не би земале брз кредит кој полесно се одобрува, но има повисоки камати, додека 10,2% велат дека би земале ваков кредит. Во анкетата близу две третини од граѓаните или 65,3% велат дека државата треба дополнително да ги регулира условите и начините за земање на брзи кеш кредити додека 16,7% сметаат дека за тоа нема потреба.

Но сепак има лица кои на своја одговорност аплицираат за брз кредит. „Кеш на рака до 15 минути“, „Кредит до плата без камата“ звучат примамливо за оние кои имаат недостаток на финансиски средства во моментот, па се одлучуваат за аплицирање, за која постапка потоа голем број и се каат. Иако се рекламираат дека се со 0% камата, во случај на доцнење со плаќање седум дена, треба да платите високи суми дури завршуваат и на извршител.

Сепак собранието минатиот месец ги усвои измените на Законот за облигациски односи и на Законот за извршување, со што стави крај на „должничкото ропство“ на граѓаните, кои често беа доведени во ситуација да плаќаат казнена камата, која го надминуваше и износот од главниот долг.

Со новите измени, каматната стапка нема да смее да го надмине долгот, односно таа престанува да тече кога ќе го достигне износот на главниот долг, a ова значи дека повеќе нема да има ситуации каде што граѓани за долг од 1.000 денари враќале и до пет пати поголем износ, а рокот за застарување на долгот го намалуваме од 10 на 5 години.

Мнозинството ги усвои и измените на Законот за финансиски друштва вкупните трошоци на земен т.н брз кредит не може да бидат поголеми од 60% од кредитот. Се прекинува праксата со која за кредит од 10.000 денари граѓаните досега враќаа и по 70.000 денари.

„Продавниците за пари“ почнаа да се појавуваат во 2015-та година. Нивната регулација е прилично нејасна, иако за нив надлежно е Министерството за финансии.