Интересот кај младите од Македонија за студирање во Словенија постојано се зголемува. Според информации до кои дојде „Денар“, повеќе од 3.000 македонски студенти во последниве две години решиле да се образуваат токму во Словенија.

Одличните услови за учење и живот, програмите, професорскиот кадар и дипломата признаена во западноевропските држави, се меѓу главните причини за популарноста на Словенија како дестинација за нашите студенти.

Дел од словенечките факултети веќе нудат и бесплатни студии за студентите од Македонија. На интернет може да се најдат сајтови преку кои може лесно да се аплицира и да се добие оваа поволност. Државата нема официјална статистика за тоа колку студенти во моментов имаме во други држави, но се знае дека за последниве 15 години државата платила стипендии на околу 400 студенти да се запишат на еден од 100-те најдобри универзитети низ светот. Тие, според условите од стипендијата, треба да се вратат и да градат кариери во земјава.

Надлежните велат дека се работи на измени во Законот за високо образование, кои треба да обезбедат повеќе права и можности за професорите и студентите. Се разгледува и можноста за обезбедување загарантирано вработување за најдобрите студенти. Исто така, се подготвува и нов Закон за студентски стандард, кој има за цел да го подобри начинот на финансирање на студентските домови, начинот на доделување стипендии и да обезбеди повеќе можности за младите луѓе кои избираат да продолжат со академско образование. Неизвесно е дали ваквите мерки можат да го спречат „егзодусот“ на македонски студенти во Словенија и во странство воопшто.