Тимови составени од униформирана полиција, инспектори од ЕВР при СВР Скопје и инспектори од Инспекторатот на Општина Гази Баба почнаа со вонредни патроли во и околу дивата депонија Вардариште, по пожарот кој пред два дена се случи на депонијата и ги вознемири и ги загрижи граѓаните што живеат во околината.

Животот и здравјето на граѓаните немаат цена и ќе направиме сè што можеме максимално да ги заштитиме. Толеранција нема да има за никој! За секој оној за кого ќе се обезбедат докази, ќе биде поведена соодветна постапка! Патролите продолжуваат и во следните денови! – информира градоначалникот на Општина Гази Баба, Бобан Стефковски.

Стефковски заедно со заменик- градоначалникот на Аеродром Дејан Митески, началникот на СВР Скопје Сашо Топаловски, командирот на полициската станица од општа надлежност Гази Баба Саше Стоилевски и припадници на МВР вчера попладне беа во депонијата, за уште еднаш да го констатираат ужасот што таму се случува.

Во изминатиот период во неколку наврати сме сведоци на пожар на дивата депонија Вардариште, кој покрај тоа што сериозно го загадува воздухот, претставува и сериозна опасност по безбедноста на жителите од овој дел на општина Гази Баба. Како при пожарот на 2.7.2024 година, така и при вчерашниот пожар имав постојана комуникација со институциите надлежни за постапување при вакви состојби, но и со голем број жители од населеното место Кирил Петрушевски – рече Стефковски.

Пожар на Вардариште, изгорени гуми и ниска вегетација

Тој вели дека барањата на граѓаните за наоѓање итно решение за Вардариште се оправдани, но како што нагласи, Општина Гази баба има ограничени надлежности за постапување.

Општопознато е дека дивата депонија Вардариште е во целосна надлежност на Градот Скопје, за што апелирам и барам од градоначалничката Данела Арсовска да издаде задолженија за реализација на своите надлежности – нагласи градоначалникот.

Тој итно ги задолжил општинските инспектори да продолжат да работи во две смени со зголемување на работното време во втората смена до 22 часот и притоа задолжително во текот на работното време и во втората смена да вршат надзор на дивата депонија Вардариште. Како што најави, ќе биде испратено барање и до Град Скопје за да се активира градскиот инспекторат со редовно дежурство на депонијата.

Градоначалничката Данела Арсовска, која не се огласува по последните случувања на дивата депонија, во јануари годинава најави дека за првпат по 60 години започнува чистење и санација на Вардариште и уште се пофали дека актуелното градско раководство го направило она што не му успеало на ниедно претходно, а тоа е да стави крај на една од најголемите опасности по животот и здравјето на граѓаните во Скопје.

Целосно ќе се исчисти и санира депонијата Вардариште

Градоначалничката тогаш соопшти дека од 2014 година постои студија за санација на депонијата.

Беше констатирано со примероци од подземна вода, отпад од телото на депонијата и присутните гасови, дека депонијата е во метанска стабилна фаза, а според гантограмот од динамиката на работите, времето за реализација на еден ваков комплексен проект изнесува 26 месеци. Со варијантата со која би се задржале далноводите на својата местоположба, се прави заштитен појас од 12 метри лево и десно, по што следува изградба на спортски игралишта, одвоено од остатокот на локацијата со зелена зона со високо зеленило. На северозападната страна планирани се дополнителни спортски содржини и терени, за централниот и североисточниот дел расад на рози, а за јужната страна изградба на парк на 60 илјади метри квадратни – соопшти Арсовска.

Според неа, на местото на депонијата ќе биде изграден голем спортски комплекс со спортско-рекреативни содржини, како и нов мегапарк и оваа локација од место кое е опасно по здравјето на граѓаните градот Скопје ќе ја претвори во локација за спорт и рекреација.

Оттогаш поминаа седум месеци, а дивата депонија е далеку од парк и цветање рози. Работите не се ниту почнати, а Арсовска сега молчи и не соопштува каде запна чистењето, зошто таму ништо не се работи и дали и од овој проект „крена раце“ како што направи и со други.

Старата дива депонија и натаму редовно се потпалува, смрди и го загрозува здравјето на граѓаните.

Инспектори и полицајци ќе „ловат“ потпалувачи на отпад во Гази Баба