На Клиниката за токсикологија закрепнува пациентот од Струмичко кој додека работел со тутун бил каснат од еден од најотровните пајаци – „црна вдовица“ (Latrodectus mactans).

Симптомите што се појавиле кај него се карактеристични за убоди од овој вид на пајак кој постои и на Балканот а тоа се изразен оток, покачен крвен притисок и тресење на мускулатурата.

Исто така, имал и карактеристичен белег од каснувањето, „два заба слични на каснување од змија“ на блиско растојание. Кога фотографијата од местото на убодот лекарите ја споредиле со други случаи на фотографии од поранешни случаи, и повеќе од јасно станало дека се работи за убод од „црната вдовица“.

Во прилог на тоа оди и неговата клиничка слика, но благодарение на брзата интервенција на медицинските стручни лица од Клиниката за токсикологија состојбата му се подобрува.

Во повеќе токсиколошки центри постои и серум против убод од „црна вдовица“, но на пациентот не му бил даден поради тоа што истиот предизвикува алергиски реакции и лекарите го третирале со симптоматска терапија за да го избегнат ризикот од анафилакса.

Местото каде што бил каснат пациентот е внатрешниот дел на надлактицата, потврдува за „Слободен печат“ директорот на Клиниката за токсикологија, професор доктор Андон Чибишев.

-Пациентот е стабилен. Примен е во интензивна нега и е лекуван под будното око на нашиот персонал. Мислам дека ќе биде добар. Се опоравува, но уште не се сите параметри задоволителни. Но, тоа што го постигнавме за нешто повеќе од 24 часа дава надеж дека оваа приказна успешно ќе се заврши, изјави за „Слободен печат“ доктор Чибишев.

Се работи за повозрасен човек со коморбидитети. Имал покачен крвен притисок и забрзана работа на срцето. Додека работел во некоја своја просторија, односно ги преместувал низите за сушење тутун, од тутунот излегол пајакот и го каснал на внатрешната страна на надлактицата.

-Откако го каснал пајакот, тој го бутнал од раката и видел дека се работи за мал црн инсект без да знае што е. После 10 минути почнале многу силни болки во мускулите и коските и силна главоболка, забрзана работа на срцето, висок крвен притисок, грчеви и една тешка општа состојба. Добро е што во Струмица има интернист со големо искуство кој специјализираше кај нас па многу брзо е интервенирано, стапено е во контакт со нашиот токсиколошки центар, се исконсултирале и веднаш почнато е со терапија уште во Струмица, објаснува доктор Чибишев.

Каснувањата од „црна вдовица“ се ретки, но постојат на Балканот. Во Македонија во деведесеттите е направена и студија на случај за околу 5 или 6 пациенти. Пајакот е присутен во Европа и на Балканот. Други извори од Клиниката за токсикологија велат дека пациентите каснати од „црна вдовица“ изминатите години биле од јужниот дел на Македонија.

Пајакот „црна вдовица“ е еден од најотровните видови на пајаци во светот. Распространет е на сите континенти. Отровот на овој пајак е 15 пати посилен од оној на другите пајаци, а во ретки случаи поради тоа, ако ненавремено се интервенира, можно е да настапи смрт.

Првичните симптоми што се појавуваат по убодот за десетина минути, е грч на местото на убодот. Грчевите продолжуваат во грбот, бедрата и рамениците, по што следува отежнато седење или стоење, тапа болка во стомакот, а можна е појава и на несвестица.

Како превентивни мерки за заштита од  пајаци и влекачи кои се активирани поради топлото време, се препорачува избегнување на ризични зони, како купишта дрва, камења, места со високо израсната трева како и носење на заштитна облека како ракавици и облека со долги ракави и ногавици. Доколку се случи каснување, тогаш се препорачува да се побара лекарска помош.