Остана активен во фудбалот, само што фудбалскиот терен го замени со тренерски ангажман во Академијата на Фудбалската федерација на Македонија, на генерацијата 2006 година. Вели дека тоа е така, зашто фудбалот не е само игра, туку начин на живот и „ако еднаш навлезеш во тие води, во него ќе бидеш со мисија целиот живот“. Вели, чест му е и предизвик да работи во ФФМ и дека го радува што работи со млади таленти – гледајќи го нивниот напредок се потсетува на времето кога тој самиот морал да го минува трнливиот пат до успехот. Сепак, во негово време условите биле многу полоши. Игор Кралевски во моментов е сосема концентриран на неговата тренерска работа со младите во ФФМ и има големи планови. За разлика од некои што се сомневаат, тој е сигурен дека набргу доаѓаат многу поубави времиња за нашите млади фудбалери.

Имаме ли талентирана фудбалска младина? Што ни недостига за креирање професионалци од светски ранг?

– Македонија секогаш имала талентирана младина која, за жал, скитајќи низ лавиринтите на една неубава страна во овој спорт, била приморана да се откаже од сонот за фудбалска професионална кариера. Откога сум во тренерските води, секојдневно сум опкружен во млади што ветуваат многу и тоа посебно ме радува. Ги мотивирам и ги насочувам на правилниот пат. Ни недостасуваат многу работи за креирање фудбалери од светски ранг, но мислам дека одиме во вистинската насока. Работата и професионалноста се најважни, и без нив, ништо. Но, сигурен сум, доаѓаат подобри времиња за македонскиот фудбал.

Кога ќе погледнеш наназад на твојата фудбалска кариера која далеку ги надмина границите на Македонија, од кој тренер со кого си работел или си соработувал најмногу си инспириран?

– Трнлив и напорен беше мојот пат низ кариерата, но секогаш бев подготвен да научам нешто од сите тренери, сите беа различни во своите методи на работа и во пристап кон фудбалот, како и во пристапот на гледање на животот. Најмногу бев инспириран и најмногу научив од големите имиња Ќиро Блажевиќ и Иван Гудељ во клубот Хајдук од Сплит, ним секогаш ќе им бидам благодарен.

Откако се повлече од професионалниот фудбал, за што најмногу зажали? Имаше ли нешто што сакаше да го направиш, а го пропушти?

– Немам потреба да жалам за ништо, често си правам ретроспектива на моето минато и, ако се вратиме наназад, навистина имав кариера со која се гордеам. Секако како млад фудбалер сонувате да го облечете дресот на некој од гигантските клубови. Единствено жал ми е што немав повеќе настапи за македонската репрезентација, но еве сега имам можност како тренер во тоа да го дадам најдоброто што го знам, а тоа е фудбалот.

Зад себе имаш два брака, каде, според тебе, се „утна“ работата? Веруваш ли и денес во бракот како институција?

– Не сметам дека нешто е „утнато“, животот е еден и треба да го живееме давајќи и примајќи љубов од вистинските, и тоа треба да е искрено и без лимит. Во моите случаи тоа не беше така и затоа во моментов е статусот каков што е. Инаку, верувам во животот и верувам во бракот како институција. Ме води онаа народната „што е мое ќе си дојде, порано или подоцна“.

Љубов е кога…?

– Љубовта е најубавиот подарок што може да ти се случи. Љубовта е емоција, љубовта е благослов. Да љубиш значи дека постоиш, дека дишеш и дека веруваш.

На какви вредности ги учиш трите деца Теодор, Андреј и Јована? Каков модел на татко настојуваш да бидеш? Има ли меѓу децата наследник во фудбалот?

– Тие се мојот живот. Навистина сум горд татко, кој пред сè со нив е пријател, а потоа и татко, сметам дека тоа е вистинскиот пристап за да ги научам на правилните вредности во ова брзо време. Секојдневно се дружиме и разговараме за сите теми. Многу сум горд на нив! Андреј веќе покажа дека сака да ги следи моите патишта низ фудбалот, веќе неколку години е дел од фудбалскиот клуб Македонија Ѓорче Петров, среќен сум поради тоа. Животот е пред него, ја има мојата поддршка и секојдневно заедно одиме на тренинг, се дружиме, разговараме и заедно гледаме фудбал. Би сакал еден ден да го видам во македонски дрес!

Како ја одржуваш формата? Се држиш ли до специфичен режим на исхрана?

– Навиките од времето кога секојдневно тренирав ми останаа непроменети, живеам спортски и мислам дека така ќе остане сè додека ме служи здравјето. Речиси секојдневно џогирам на градскиот кеј, со слушалки на ушите, слушајќи добра музика. Водно е мојата втора дестинација, особено во раните утрински часови кога џогирајќи уживам во планинскиот пејзаж. Во однос на исхраната, внимавам колку што е можно во ова динамично темпо што го живееме.

Кој е Игор Кралевски приватно?

– Гледам да уживам во секој единствен ден од животот, првенствено со мојата фамилија, а потоа и со моите искрени пријатели кои, фала му на бога, ги имам во голем број. Ме прави среќен секојдневната дружба низ нашето Скопје со убави и урбани луѓе. Не ме прави среќен тоа што сè почесто се губат човечките вредности и што нашето Скопје го губи сјајот, но се надевам дека тоа ќе се промени. Најмногу ме растажува тоа што бројни пријатели не гледајќи излез, ја напуштаат Македонија и го бараат своето подобро утре во странство, заедно со своите семејства, а јас се посветив на животната мисија да го променам тоа. Како се забавувам? Во последно време чекајќи да заврши тренингот на Андреј со останатите родители, а откако ќе завршам со обврските, во вечерните часови се забавувам со моите деца гледајќи добар филм, дома или в кино, посетувајќи некоја театарска претстава или, многу ретко, одејќи на по еден пијалак со драги личности во некој ресторан.