Проблемот кој тлее веќе неколку децении низ факултетите на Универзитетот „Св. Кирил и Методиј“ е неодговорноста на вработените во студентските сервиси и неодговорноста на професорите.

Секој од студентите е должен да пополни пријава за да може да полага испит. Многу често професорите не дозволуваат ни да влезеш на полагање без пријава. Секако, студентите си ја исполнуваат оваа должност, но што се случува со неодговорноста на оние кои понатаму ги собираат тие пријави?

Полека, но сигурно, пријавите се „губат во процесот“. А ова студентите го сфаќаат во моментот кога ќе дојде време тие да аплицираат за уверение за завршено високо образование. Тогаш за да се изработи уверението потребни се сите пријави од сите испитите кои ги полагале.

Неколку студенти посведочија за ваквата неодговорност од страна на службите на факултетите:

– Ги имав положено сите испити и ги поднесов соодветните документи за да добијам уверение за завршено високо образование. Меѓутоа уверението не можеа да ми го изработат бидејќи ми биле изгубени 7 пријави за испит, а сите испити ми беа положени. Дипломирав подоцна бидејќи ги „бркав“ професорите за да земам оценки, па дури некои кои се пензионираа во меѓувреме, морав да ги контактирам. Бев принудена да купувам нови пријави за да може да се комплетираат документите за да се направи уверението – изјави поранешен студент на Медицински факултет при УКИМ.

Ова е честа појава на факултетите и тоа го потврдија студенти кои студираат на различни факултети.

– Ги поднесов документите потребни за да се изработи уверението за завршено високо образование. Ми рекоа дека ќе ме побараат кога ќе биде изработено уверението, но не добив повик од нив. Напротив, ми се јави мојот колега и ме извести дека нему му недостасуваат 6 пријави за испит, а мене 5. Тоа е еден цел семестар. Кога отидов да прашам како моите пријави за веќе положените испити се изгубени, добив одговор од вработените во студентски прашања дека за да не губам време, најдобро би било да си купам нови пријави. Професорите лично ги побарав и ги замолив да го решат овој проблем, бидејќи јас не треба да сносам одговорност за изгубените пријави – сподели студентка која студирала на Правниот факултет, при УКИМ.

Побаравме мислење и од студентскиот правобранител чија функција е да се погрижи да не бидат прекршени правата на студентите. Прашавме дали кај нив досега бил пријавен ваков случај и што направиле за да ги заштитат правата на студентите, на што ни одговорија дека досега немале пријавен ваков случај, но веруваат дека ваков проблем се случува во студентските служби бидејќи сѐ уште не е воведена целосна дигитализација на системот.

– Идеално решение за ваквите случаи е целосна дигитализација на системот што подразбира воведување на стабилен дигитален систем, но и измена на законот за архивско работење со цел стдентите да не купуваат документи, но и административниот кадар да не води двојна евиденција (хартиена и дигитална) како што е случај досега. Со ваквиот чекор би го решиле проблемот ефикасно за двете страни. Но, за индивидуално пријавените случаи, откако би утврдила дека навистина им е изгубена пријавата, би понудила решение до Деканатот на факултетот, студентот да не ја плаќа пријавата повторно и истата да биде компензирана од самиот факултет, а дистрибуирана од студентската служба. Кога студентите веќе еднаш платиле за пријава и уредно ја доставиле до студентски прашања или професорот, не треба да подлежат на повторни финансиски трошоци бидејќи не се виновни за изгубената пријава. Студентската служба треба да им достави нова пријава која студентот ќе ја пополни повторно, но нема да ја плати. Всушност, допис кој ја констатира оваа ситуација би можел да се испрати до сите едници на УКИМ и е нешто на кое што можам да работам во наредниот период за да се реши проблемот на сите факултети – изјави за „Слободен печат“ студентската правобранителка Савче Ѓошева.

Дека досега нема пријавено ваков случај, или барем дека не биле известени потврди и претседателот на Универзитетското студентско собрание (УСС), Александар Николовски, кој за „Слободен Печат“ изјави:

– Досега ниту еднаш се немаат пожалено студентите до УСС дека се изгубени пријавите за испити, и доколку се случи тоа, активно и бурно би преземале решенија за тоа да не се случува.