Повеќе од две години поминаа откако Град Скопје и Шумарски факултет потпишаа меморандум, со кој Градот се обврза да ослободи повеќе од 800 дрвја, заробени во бетон и асфалт низ скопските улици, но бројката на забетонирани стебла низ градот и натаму е голема. 

Граѓаните, кои и претходно укажуваа на овој проблем, тогаш разбраа на колкав број дрвја, заради оваа состојба им се заканува изумирање, во услови кога секое дрво е непроценливо богатство за воздухот во градот. На неодамнешниот повик на градоначалникот Петре Шилегов до скопјани да дадат предлог за тоа каде треба да се засади ново зеленило, граѓаните повторно укажаа и на проблемот со забетонираните стебла на дрвјата, за кои наведоа и прецизни локации, како на пример костените долж улица Ленинова, но и заробените дрва на Партизанска, околу „Народна техника“.

Пред неколку години Градот и општините започнаа да ги ослободуваат стеблата на дрвата за да се спречи нивното уништување, но непознато остана зошто работата запре. Од Град Скопје нема одговор кога ќе продолжат со ослободувањето на забетонираните стебла на дрвјата на локациите што се во нивна надлежност, ниту за тоа дали имаат евиденција уште колку загрозени дрвја има на јавните површини низ Скопје.

Неодамна Општина Карпош продолжи со  акцијата за ослободување на дрвја од градежни материјали, при што се отстранија бекатон плочки и асфалт од 16 дрвја на улицата Разловечко востание во Карпош 4. Оттаму тврдат дека во континуитет вршат увид и интервенции од овој вид на дрвјата на своја територија и дека минатата година ваква активност спровеле на улицата Веселин Маслеша во населбата Карпош 2.

-И лани и годинава, преку локациите коишто ги посочивме, може да се види дека приоритет околу средување на местата каде што се засадени дрвјата, односно отстранување на градежните постаменти, имаат дрворедите долж улиците во Карпош, но Општината ќе работи на ослободување на стеблата секаде каде што е потребно и можно – велат од Општина Карпош, но не прецизираат за колкава бројка заробени дрвја станува збор.

Во моментов на територија на Општина Центар има околу 200 дрвја на чии стебла и корени им треба спас. Но, за тоа да се случи, се чека да помине пандемијата.

– Со оглед на пандемијата на ковид-19, со ослободување на дрвјата ќе се продолжи веднаш штом се создадат услови за нивно физичко ослободување, без да се загрози здравјето на работниците кои го вршат ослободувањето – велат од Центар.

Колку за потсетување, при потпишувањето на меморандумот пред две години беше кажано дека заробени дрвја најмногу има околу булеварите и поголемите сообраќајниците, оти пречесто се бетонира и се поплочува до самото стебло и на тој начин дрвјата се животно загрозени и се повредуваат, како и дека многу од нив ќе бидат исушени ако не бидат брзо ослободени.