Општина Кисела Вода денеска со повеќе настани ја одбележува 68-годишнината од нејзиното формирање. По тој повод, утрово кај крстот во Усје започнаа градежни активности за изградба на мал рекреативен центар.

 На овие 800 квадратни метри градиме мини рекреативен центар на кој ќе има урбана опрема, клупи, реквизии за детско катче, парковско зеленило, а ќе биде решено и паркирањето преку изградба на паркинг простор, рече градоначалникот Орце Ѓорѓиевски кој најави дека овој простор на жителите ќе им биде на располагање за еден месец.

Покрај ова, во општината се одвиваат бројни активности. За роденденот на Кисела Вода  300 талентирани ученици, спортисти и наставници добија награди-ваучери од општината за остварениот успех.

Точно напладне започна свечената седница на Советот, каде статуетки-клучеви од општината ќе добијат 25 заслужни граѓани, а благодарници ќе добијат и претседателите на месните задници кои, како што рече Ѓорѓиевски, преку својот секојдневен ангажман се значајна алка во процесот на остварување на правата на граѓаните.

Во 17 часот во паркот „Шопен“ почнува хуманитарна Коријада во организација на Здружението на пензионери од Кисела Вода, а потоа прославата ќе продолжи пред салата Расадник, каде вечерва жителите на Кисела Вода ќе ги забавува групата „Нокаут“.