На Владата не ѝ се брза да го разгледа барањето на невладините за автентично толкување на Изборниот законик за учество на независните на изборите. Собранието го чека мислењето од Владата дали ќе има автентично толкување, а претседателката на државата Гордана Сиљановска-Давкова независните ќе ги прими на средба откако ќе се врати од Шпанија. Ова сублимирано се одговорите за „Слободен печат“ од трите институции за барањето на невладините организации за итно автентично толкување на Изборниот законик, испратено пред речиси половина месец, откако Уставниот суд го укина високиот праг за потписи од граѓаните што се неопходни за учество на изборите, а пратениците предложија повисок од веќе укинатиот.

Неизвесно е дали и колку потписи ќе бидат потребни за независните листи, иако газат роковите зашто претседателот на Собранието Африм Гаши локалните избори треба да ги распише кон крајот на јули или на почетокот на август.
Од кабинетот на Сиљановска-Давкова за „Слободен печат“ потврдија дека претседателката ќе се сретне со невладините.

– Можеме да потврдиме дека претседателката Гордана Сиљановска-Давкова ќе прими претставници на невладините организации, кои ќе бидат поканети во Кабинетот веднаш по нејзиното враќање од работната посета на Севиља, Шпанија – велат од кабинетот на Сиљановска.

Претставници на седум невладини организации побараа итна средба со шефицата на државата и, како што соопштија, на средба досега ниту биле повикани ниту биле удостоени со одговор. Од Сиљановска очекуваат државнички и демократски капацитет наместо игнорирање. Тие побараа Сиљановска-Давкова да не го потпише указот за законот ако тој помине во Собранието.

– Како член на Групата независни експерти за Европската повелба за локална самоуправа при Советот на Европа во Стразбур и експерт на ОН за избори од 1998 година до денес, поранешен професор по Уставно право и локална самоуправа, очекувавме сосема спротивно однесување и покажување државнички и демократски капацитет, а не комплетно игнорирање на чекор пред распишување на изборите, кога имаме правна несигурност и кога се доведуваат во прашање уставно загарантираните права за илјадници граѓани – велат од невладините.

Тие додаваат дека од барањето за итна средба со координаторите на пратеничките групи во Собранието, ВМРО-ДПМНЕ не ги удостоиле со одговор или средба по изминати две недели, додека средба со координаторот на ЗНАМ е најавена за неделава.
Барањето за автентично толкување до Собранието и до Владата го поднесе пратеничката Моника Зајкова од ЛДП во име на независните.

Од Собранието за „Слободен печат“ велат дека го чекаат мислењето од Владата. Од Владата, пак, ни одговорија дека барањето е во владина постапка и сè уште не е разгледано.

– Бараме Владата и Собранието итно да ја спроведат одлуката на Уставниот суд, како и да се изврши автентично толкување на Изборниот законик. Бараме Владата и пратениците да ја завршат во најбрз можен рок промената во Изборниот законик, почитувајќи ги сите правни стојалишта изнесени од Уставниот суд за укинување на противуставните измени на Изборниот законик со кои се предвидуваа еден отсто потребни потписи од вкупниот број избирачи за кандидирање на независни листи, како и да го толкуваат сегашниот статус на независните кандидати на претстојните избори – велат невладините.

Тие ги повторија нивните барања, односно да се постави услов од 20 до 100 потписи и 200 собрани потписи за Град Скопје за независни листи на кандидати, по примерот на многу европски држави.

– На еден месец пред распишување на изборите, има предлог на Изборниот законик што не е изгласан, кој е спротивен на Уставот и одлуката на Уставниот суд и со кој повторно се зголемува бројот на потписи потребни за кандидирање независни кандидати. Предложениот број на потребни потписи е од 100 до 1.000, но и 3.500 за Град Скопје. Најголем дел од поставените прагови надминуваат 1 отсто од избирачите, што е решение полошо од тоа што Уставниот суд го укина во мај годинава. Од една страна има противуставен предлог за повторна измена на Изборниот законик, од друга нема официјално толкување за сегашната состојба со укинатите два члена од Уставниот суд со кои се одредува бројот на потписи потребен за кандидирање на независните – велат невладините.

Тие додаваат дека за конфузијата да биде поголема, во „Службен весник“ во сила се старите одредби на членовите 61 и 62, кои се однесуваат на собирање потписи за независните кандидати.

Големите партии со нова сопка за независните кандидати, бројот на гласачите по општини ќе го дефинира прагот на потписи