На македонскиот пазар нема производи што содржат активни материи кои се наоѓаат во  конопот, односно ТХЦ, потврдуваат од Агенцијата за храна и ветеринарство за „Слободен печат“. Трговијата со производи со зголемено присуство на опојниот ТХЦ е забранета во многу земји, вклучително и во Северна Македонија.

– Ве известуваме дека производи што во себе содржат коноп односно ТХЦ не се увезуваат, односно нивниот увоз е забранет во Македонија – децидни се од АХВ.

Откако повеќе регионални медиуми објавија дека германскиот трговски синџир „Лидл“ повлекува колачи, чај и протеински плочки поради високата содржина активни состојки што содржат коноп, „Слободен печат“ се обиде да провери дали такви производи веќе се увезени и се продаваат на нашиот пазар. За среќа на домашните потрошувачи, споменатите производи што биле со потекло од Чешка, не се наоѓаат во трговската понуда. Според образложението на компанијата „Лидл“, кое е објавено во странските медиуми, во овие кондиторски производи и во чајот е најдено зголемено присуство на тетрахидроканабинол (ТХЦ), што би можело да влијае врз здравјето на луѓето, со промена на расположението и замор. Од „Лидл“ ги предупредија сите што купиле некои од овие производи, да не ги консумираат.

– Во средината на август, „Лидл“ како мерка за претпазливост ги повлече сите производи од коноп во својот промотивен асортиман, бидејќи надлежните во моментов испитуваат дел од нив. Според истражителите, станува збор за можно кршење на германскиот закон за наркотици, а „се проверува дали понудените производи содржат ТХЦ или ЦБД“ – објави порталот Индекс.хр.

И хрватското министерство за земјоделство наредило да се повлече масло од коноп поради зголемено присуство на ТХЦ, бидејќи тој производ не е во согласност со европската Уредба за безбедност на храната.

Во изминатиот период во земјава имаше неколку повлекувања на храна што во себе содржеше недозволени супстанции, меѓу кои и сладоледи со потекло од Франција и од Полска поради присуство на етилен оксид, а лани беше повлечен и небезбеден сусам од Индија, кај кој беше утврдено присуство на резидуи од пестицид етилен оксид.