Дваесет и деветгодишен маж од Северна Македонија е уапсен и привремено приведен со цел екстрадиција во Австрија, откако се обидел да ја напушти Република Албанија, додека австриските власти го барале како осомничен за кривично дело „трговија со дрога“, објавија албанските медиуми.

Како резултат на детални контроли и проверки при влез/излез, со цел сузбивање на незаконитостите на границата, како и приведување на барани државјани кои се обидуваат нелегално да се движат за да избегнат кривична одговорност, службите на граничната полиција од Ќафасан го приведоа на излез македонскиот државјанин Монди Гитлан, 29 години, жител на Велешта, Северна Македонија, пишува Ора Њуз повикувајќи се на извори од албанската полиција.

Од извршените проверки и од информациите разменети со австриските партнери, преку Интерпол Тирана, произлезе дека тој е меѓународно баран од Интерпол Виена, Австрија како осомничен за сторено кривично дело „трговија со дрога“.

Интерпол Тирана, во соработка со колегите во Австрија, ги продолжува процедурите за екстрадиција на 29-годишникот.