Претседателот Стево Пендаровски, според вообичаената ротација меѓу премиерот и претседателот на Собранието по повод државниот празник 2 Август, Илинден – Денот на Републиката, ќе остане во Скопје каде под негово покровителство се предвидени повеќе активности.

Минатата година чествувањето на Илинден на Мечкин Камен, помина во тензична атмосфера, односно свирежи кон државниците и силно полициско обезбедување, освен во 2020 година кога поради пандемијата со коронавирусот не се организираа масовни собирања. Лани „домаќин“ на прославата беше претседателот Стево Пендаровски кој не го одржа традиционалниот говор на Мечкин Камен, што досега сите говорници го користеа за да упатат важни политички и државнички пораки. Претседателот воведе нов концепт и ги повика сите политичари да дојдат попладнето во Крушево за да нема поделби и тоа да биде симболичен чин на обединување. Исто така, лани ЦК на ВМРО-ДПМНЕ ги повика симпатизерите да не одат на прослави на Илинден организирани од СДСМ, за да не бидат обвинети за инциденти кои можат да бидат и инсценирани, откако претходно се појавија шпекулации дека тие ќе предизвикаат нереди на чествувањето.

Годинава,  според програмата доставена од Кабинетот, претседателот Пендаровски утрото на  2. август ќе положи цвеќе на Споменикот на паднатите борци од НОБ во Алејата на великаните на градските гробишта во Бутел и ќе се поклони на гробот на првиот претседател Киро Глигоров, на гробот на генерал Михајло Апостолски, и на гробот на претседателот Борис Трајковски.

Потоа, на платото во Кабинетот на претседателот ќе се одржи централна манифестација, на која ќе се обрати претседателот Пендаровски и ќе бидат доделени одликувањата Орден на Република Северна Македонија, Орден за воени заслуги и Медал за храброст.

Со Орден на Република Северна Македонија, постхумно ќе биде одликуван Крсте Црвенковски, за својот особен, стратешки, долготраен и неповторлив придонес во втемелувањето и во развојот на македонската држава и на македонското општество.

Со Орден за воени заслуги, постхумно ќе биде одликувана Невена Николова Георгиева – Дуња, за извонредната храброст, пожртвуваноста, непоколебливоста и за лидерската улога во антифашистичката борба во работничките и во синдикалните движења, коишто се застапувале за социјална правда, со што ја задолжи нашата држава со своето херојско дело и со својот пример за посветеност на заедничката цел и на заедничката борба за подобар и поправеден свет.

Со Медал за храброст ќе бидат одликувани: Никола Стојановски, Јован Величковски, Трајанка Аврамовска (постхумно), Илија Дуновски, Никола Николоски, Цветко Цветкоски, Кадрија Џафери и Дaфинка Богоева. Осуммината се одликуваат за пожртвуваноста, за истрајната борбеност и за животната посветеност на високите цели на заедницата, како и за целокупниот влог во Народноослободителната борба, што се согледува низ нивните карактеристики, а и низ карактеристиките на голем број генерации борци, кои не ги штедеа своите животи за слободата, втемелувајќи ги основните насоки за градење на државата.

Во Скопје, делегација од Кабинетот на претседателот, предводена од генералниот секретар, Миле Бошњаковски, ќе положи цвеќе на споменикот на АСНОМ во паркот „Жена-борец”, на споменикот на Никола Карев пред Собранието на Република Северна Македонија, и на споменикот на Методија Андонов – Ченто на плоштад „Македонија”.

Ковачевски на Централната прослава во Крушево, Џафери во Пелинце

Во Крушево, каде годинава по повод 2 Август – Денот на Републиката, ќе се обрати претседателот на Владата на Република Северна Македонија, Димитар Ковачевски на свеченоста на Мечкин Камен, делегација од Кабинетот на претседателот Пендаровски ќе положи цвеќе на гробот на Никола Карев, на споменикот на хероите на месноста „Слива” и на Мечкин Камен.

Свечената програма во организација на Владата на Република Северна Македонија започнува во 11:30 часот со положување на цвеќе на Мечкин Камен во Крушево.

Во Пелинце, делегација од Кабинетот на претседателот ќе положи цвеќе пред Меморијалниот центар на АСНОМ, а таму пред граѓаните ќе се обрати претседателот на Собранието Талат Џафери.

Во Смилево, делегација од Кабинетот на претседателот ќе положи свежо цвеќе на Могилата на Даме Груев, на споменикот на смилевските илинденци и на спомен-плочата на партизанскиот одред „Даме Груев”.

Чествување со Бугарија по Договорот за добрососедство

 Согласно со неодамна потпишаниот билатерален протокол за спроведување на Договорот за добросеседство одредени настани и личности Македонија треба да ги чествува заедно со Бугарија до крајот на 2022 година.

Според обврзувачки билатерален протокол,  благодарение на кој Софија го тргна ветото во Брисел за македонските преговори за членство во ЕУ, се предвидува дека „двете држави во 2022 и 2023 треба да ги чествуваат сите заеднички историски настани и личности кои се веќе договорени од Заедничката експертска комисија за историски прашања, а ако има политичка волја од двете држави, ќе се прославуваат и други заеднички историски настани и личности“. Предвидено е и во рок од еден месец по потпишувањето на Протоколот, македонската и бугарската влада на своите сајтови да ги објават сите веќе усвоени препораки од досегашната работа на Историската комисија.

Комисијата досега даде препораки до владите во Скопје и Софија за заедничко чествување на пет личности – Цар Самоил, браќата Кирил и Методиј и Свети Климент и Свети Наум Охридски. Согласно Протоколот, се очекува заедничко чествување на Самоил на 6 октомври, како и на Свети Климент Охридски на 8 декември, што е и државен празик во Македонија, иако претходно историчарите од Комисијата изјавуваа дека заедничките чествувања со Бугарија ќе се случуваат само при значајни годишнини и јубилеи.

Бугарските апетити се однесуваат и на старословенската историја. Солунските браќа, светите учители Кирил и Методиј, Цар Самоил, Гоце Делчев, Прличев и многу други, се само дел од листата на македонски личности од кои СДСМ и ДУИ се откажаа и со ставањето потпис на Протоколот и им ги подарија на Бугарите и се согласија да се избрише нивното фашистичко и окупаторско минато во Македонија.