Застарената германска инфраструктура може да бара околу 400 милијарди евра инвестиции во наредните години, предупреди економистот и советник на министерот за финансии Ларс Фелд.

Патната, железничката и енергетската инфраструктура бараат итни инвестиции, покажува новата студија на професор од Универзитетот во Фрајбург и советник на министерот Кристијан Линднер.

„Владините инвестиции долго време не успеваат да одржат статус кво“, заклучува Фелд. Помеѓу 2025 и 2028 година, само на патната инфраструктура ѝ се потребни повеќе од 57 милијарди инвестиции, а 63 милијарди се потребни за железничката мрежа, според студијата нарачана од менаџерот на фондот „Унион инвестмент“, пишува Индекс.хр.

Потребните инвестиции во енергетски капацитети на копно и на море како дел од зелената транзиција би можеле да достигнат сума од 270 милијарди евра, се наведува во извештајот.

Добивањето капитал би можело да биде отежнато поради стагнацијата на германската економија, а рацете на владата во Берлин се врзани поради строгите фискални регулативи, таканаречената „должничка кочница“.

Во 2022 година, стапката на инвестиции во Германија, изразена како учество на јавните инвестиции во бруто домашниот производ (БДП), беше 2,6 проценти и е приближно еден процентен поен пониска од просекот на земјите членки на Организацијата за економска соработка и развој (ОЕЦД).