Градоначалничката Данела Арсовска продолжува со менување директори, нешто што стана вообичаена пракса во нејзиниот досегашен мандат, само што веќе престана да ја информира јавноста за квалификациите на личноста што ја поставува на раководна позиција и за причините за разрешување на претходниот директор..

Последен на листата разрешени е в.д директорот на ЈП „Водовод и канализација“, Виктор Панчевски, кој оваа функција ја вршеше само шест месеци, а на негово место е именуван Тони Миновски, вработен во претпријатието.

Од доаѓањето на Арсовска на чело на Град Скопје пред неполни три години, Миновски е петти по ред директор на ова претпријатие. Најпрво за директор беше поставен Златко Перински од ВМРО-ДПМНЕ, кого го разреши со обвинување дека го „брцнал рачето во медот“ во врска со тендерот со пречистителната станица. На негово место го постави Марјан Митовски, во чиј мандат дојде до протест на вработените со барање за негово разрешување.

По неколку месеци и Митовски беше разрешен, а за нов в.д директор поставен Драган Илиевски, кој дотогаш беше в. д. директор во Зоолошката градина. Очигледно и Илиевски не и се погоди на градоначалничката, па на почетокот на годинава на негово место го именуваше Панчевски, кој сега е разрешен.