На албанско-грчката граница  уапсен е уште еден 19-годишен Хрват, Домагој перез, за кој се сомничи дека токму тој го прободел со нож 29-годишниот грчки навивач Михалис за време на инцидентот кој се случи по мечот меѓу АЕК и Динамо Загреб.

19-годишникот се обидел да избега со автобус кој возел на линија Атина – Тирана. Уапсен е на грaничната точка Какавија. Полицијата го привела и ќе го сослушува во полициската станица во Јанина.

Во меѓувреме, во хотел во центарот на Атина уапсени се други 9 хрватски навивачи на загрепски „Бед Блу Бојси“. Други седум Хрвати се уапсени на границата Евзони, а според информациите се обидувале да побегнат со комбе во кое биле пронајдени ножеви и палки.

Истрагата ќе ја води полицискиот генерал-полковник Елефтериос Гарилас, кој, исто така, ќе испита зошто атинската полиција не успеа да ги сопре хулиганите и покрај тоа што им беше забрането да ги посетат навивачите за натпреварот против АЕК. Поради овој конфликт со трагични последици, Здружението на европски фудбалски асоцијации (УЕФА), под чија надлежност се игра Лигата на шампиони, одлучи да го одложи натпреварот.

Седум високи грчки полициски офицери се суспендирани, а отворена е интерна истрага за доцнењето со полициската интервенција по синоќешните навивачки инциденти во Атина во кои членови на загрепски „Бед Блу Бојси“ нападнаа фанови на АЕК.