Пејачката и кантавторка Дина Јашари ќе го отвори претстојниот концерт на групата „Масив атак“, во рамки на годинашното издание на фестивалот „Скопје колинг“. Македонските обожаватели на оваа британско дуо ќе имаат можност да ги чујат во живо на 28 јуни, на Стадионот на АРМ во Скопје.

„На прашањето кој би требало да го отвори концертот на еден од најмагичните глобални бендови на сите времиња, изборот тоа да биде домашниот артист со најмагичен глас беше очигледен и едногласен.

Претставник, а некои би кажале и лидер на новиот македонски музички бран, добитник на регионалната награда ‘Милан Младеновиќ’ во 2022, харизматичната кантавторка и продуцентка Дина Јашари цврсто го зазеде своето место под регионалното музичко небо и сосема заслужено ќе настапи пред ‘Масив атак’“, велат од продукцијата „Авалон“, кои традиционално го организираат „Скопје колинг“.

Доколку се уште не сте ги купиле своите билети за концертот на „Масив атак“, тоа можете да го направите на avalonbooking.mk и во продажната мрежа на karti.com.mk низ Македонија по следните цени и категории: партер – 1.990 денари и фан пит – 2.990 денари.

Да потсетиме, веќе следниот ден (29 јуни) е резервиран за концертот на словенечката група „Џокер аут“.