Џезиде Алиу, која со 111 години беше најстарата Косовка, починала во својот дом во Феризај (Урошевац), јавија локалните медиуми.

Таа е родена на 5 август 1913 година во селото Станчиќ (Станај) кај Гњилане, а според косовските медиуми, Џезиде била и најстарата позната жителка на Балканот воопшто, по смртта на исто така 111-годишната Јоана Проју Димитријаду од Грција минатата година.

Медиумите често се интересираа за Џезиде Алиу, која на 104-годишна возраст одеше да ги посети роднините во Куманово. Тогаш, тие пишуваа дека Алиу има вкупно 60 потомци – пет деца, внуци, правнуци и чукунвнуци, како и дека не носи очила, има одлична меморија и без проблем користи мобилен телефон. Во 2021 година, таа беше најстариот гласач на парламентарните избори во Косово.

Џезиде Алиу ќе биде погребана утре.