Во годишните програми ставаме за проверка имоти на судии и на обвинители, но не можеме да провериме 500 судии и обвинители во една година, вели претседателката на Државната комисија за спречување на корупцијата Билјана Ивановска за „Слободен печат“, прашана за коментар на изјавата на професорката од Правен факултет Ана Павловска Данева која потсети дека Антокорупциска комисија откри дека повеќе судии не можат да го докажат потеклото на својот имот, но не сторила повеќе.

– Не можеме да провериме потекло на имот на 500 судии и обвинители. Ние работиме според годишна програма за проверка на функционерите и претходно правиме проценка на ризик за тоа колкумина и кои да ги ставиме во програмата. Тогаш кога почнавме да ги проверуваме судиите, од Судски совет немаа одредено критериуми за да ни дадат примерок на судии кои би ги провериле, па принципиелно ги проверивме сите претседатели на судовите. За да биде ставен некој функционер во годишната програма за проверка треба претходно да се направи процена на ризик. Нам толку ни дозволуваат законите и ресурсите, понатаму има други институции кои треба да постапуваат, како Јавно обвинителство, финансиска полиција, УЈП, кои делуваат самостојно или постапуваат според наодите на другите институции – вели Ивановска за „Слободен печат“.

Професорката Павловска Данева зборувајќи за состојбата во правосудството и ниската доверба на граѓаните во судската власт истакна дека е неопходна проверка на имотот на сите судиите и обвинители.

– Не би го исклучила ветингот за обвинителите и за судиите од аспект на проверка на потеклото на имот. Тоа е нужно, тоа е неопходно, тоа е здраво за  самите судии, особено оние кои не се огрешиле пред законот. Ние слушнавме дека Антикорупциска го имаше тоа ставено во својата програма дека ќе ја проверат имотната состојба на 500 судии, а успеаја само на претседателите на судовите. Колку што се сеќавам, и тоа во јавноста не беше многу експонирано, кај тројца претседатели на судовите најдоа надминување на имотот во споредба со тоа какви примања имаат. И што направи ДКСК освен една прес конференција?“ – рече Павловска Данева за „Сител“.

Таа додаде и дека ние немаме судии и обвинители кои припаѓаат на СДСМ, ВМРО-ДПМНЕ или ДУИ, туку тие секогаш им припаѓаат на оние кои се на власт. Причина за клиентелизмот кај правосудниот кадар според Данева е трговијата со влијанија, услугите кои им се нудат, вработување на членови од семејството…

– Не е точно дека судиите и обвинителите и служат на идеолошката матрица на партијата која на времето ги бирала. Јас тврдам дека во нашава држава, за жал, ние немаме судии и обвинители кои припаѓаат на ВМРО-ДПМНЕ, СДСМ или ДУИ. Буквално за жал, интегиртетот е на такво ниско ниво кај судиите и обвинителите, не знам од што е тоа предизвикано, имаат траен мандат, релативно добри плати, но тие се сечии, тие се секогаш на оние кои се на власт. Ние видовме дека судии и обвинители избрани во време на ВМРО-ДПМН на Груевски сега стануваат најблиски соработници на Заев и на Ковачевски. Нема идеолошка матрица, туку да се биде секогаш блиску до власта – вели Павловска Данева.

Антикорупциската комисија имотите на претседателите на судовите ги проверуваше во 2020 година, кога го споредуваше пријавениот имот во анкетните листови со податоците во банките, катастарот, берзата… Тогаш беше најавено дека ќе продолжи проверката на имотот на судиите и обвинителите и во наредните години, според можностите и капацитетите на Комисијата. Како критериуми за проценка на ризик за судиите е број на дисциплински постапки, број на поплаки од граѓани, број на заостанати предмети итн.

Во годишниот план за оваа 2023 година е наведено дека правосудството со години наназад е оценета како област со најголем ризик за корупција, па ќе се следи имотната состојба на функционери од оваа област, заедно со функционери од законодавната и од извршната власт. За цела година ќе бидат проверени имотите на пет обвинители, пет судии, шест пратеника и на пет функционери од Владата, согласно со техничките и човечкиоте ресусрси на ДКСК.