„Металците“ имаа одлично второ полувреме во кое се изборија за голема предност против тимот на Широки (85:69) пред реваншот за седум дена. Вечерва, аеродромци го одиграа првиот натпревар од четвртфиналната серија на плеј-офот во АБА 2 лигата.

Израмнето се играше во првите десет минути од овој четвртфинален дуел, првиот од двата предвидени помеѓу двата стари и добро познати ривали од оваа регионална конкуренција. МЗТ Скопје имаше минимална предност (18:17).

Но од почетокот на втората, гостите успеаја во обидите да ги свртат и играта и резултатот во своја корист. Во рок од неполни четири минути, направија добра серија од (13-4) и поведоа со солидни (30:22).

По тајм-аутот на тренерот Атанасов, домаќините, во голема мерка, по заслуга на расположениот Делалиќ, успеаја да се доближат, односно со своја мини-серија, да намалат на (30:33). Нешто потоа имаа и уште пониска негатива (36:38), за на полувремето Широки сепак да ја задржи предноста на својата страна (41:37).

На почетокот на второто, скопските „сино-бели“ влегоа во нова серија. Реализираа девет поени по ред, и конечно успеаја да имаат позитивен резултат. Сосема солидни (46:41), стекнати во нешто повеќе од три минути. Ја продолжија серијата домашните кошаркари и на (17-4) по која стекнаа уште поголеми (54:45), момент од 26.минута.

Предводени од двоецот Војдан Стојановски-Делалиќ, МЗТ Скопје дојде до голем плус од 16.поени со кој за седум дена ќе тргне (уште еднаш во оваа сезона) во Широки Бријег каде ќе се бие втората битка за полуфинале.

Војдан застана на 21.поен, но имаше и пет скока и четири додавања, Делалиќ го следеше со 17. Им се приклучија и Танасковиќ со 16.пени (и седум скока), односно Гилон, кој дополни со 11.поени (четири скока и три асистенции).