Министерството за внатрешни работи се огласи околу двојното убиство и самоубиство кое попладнево се случи во Велес. Жртвите се поранешната невенчана сопруга на убиецот, која имала 31 година, и нејзиниот татко (74). Двајцата биле убиени со нож, а 39-годишниот насилник потоа самиот си го одзел животот, исто така со оружјето со кое ги извршил убиствата.

„Денеска (15.09.2025) во 15:30 часот во СВР Велес е пријавено е дека на ул. „Кочо Рацин“ во Велес е пронајдено женско лице со повреди од остар предмет. На местото излегоа полициски службеници и констатираа дека се работи за Р.К.(31) од градот, која од Итна медицинска помош е пренесена во болницата во Велес, каде што е констатирана смрт. Веднаш потоа, во домот на нејзиниот татко на истата улица, пронајден е починат и татко и К.К.(68), кој исто така, имал повреди од остар предмет. Во домот со повреди од остар предмет е пронајден и И.С.(39) од Скопје, поранешен партнер на Р.К., за кој според првичните информации постои сомнение дека ги нападнал двајцата, по што сам се повредил. Откако е пренесен во болницата во Велес и кај него е констатирана смрт“, велат од полицијата.

Од болницата во Велес велат дека жената имала повеќе убодни рани од нож, а убиецот не давал знаци на живо. Тие се донесени во Ургентниот центар попладнево по 16 часот. Дежурни лекари-хирурзи ја примиле жената и се обиделе да ја реанимираат, но не успеале да ја спасат, велат од болницата.

Неофицијално, жртвата повеќепати го пријавувала убиецот во полиција поради закани по нејзиниот и животот на нејзиниот татко, а тој и ѝ го запалил автомобилот.

Увид на местата на кои е извршено ужасното злосторство попладнево врши јавен обвинител заедно со екипа СВР Велес и се преземаат мерки за расчистување на случајот, додаваат од СВР Велес.

МВР за ужасот во Велес: Убиецот им отишол дома и со остар предмет ги убил поранешната сопруга и нејзиниот татко