МВР попладнево се огласи во врска со страотниот случај во тетовското село Слатино, каде попладнево биле пронајдени мртви 36-годишна жена и нејзиното бебе, чијашто точна возраст не се соопштува.

Од полицијата велат дека сопругот на починатата и татко на бебето, заедно со нивното друго дете – синот, кој исто така е малолетен, биле пренесени во болница. По укажувањето лекарска помош, таткото ќе биде приведен на сослушување околу околностите под кои починале жената и бебето, чии тела се предадени на обдукција која треба да ги открие причините за смртта.

Неофицијално, освен телата на мајката и ќерката, во куќата биле пронајдени и таткото и синот, кои биле во тешка состојба. Истражните органи, исто така неофицијално, се сомневаат на труење.

Еве што соопшти МВР околу случајот:

„Денеска (08.10) околу 14:00 часот во СВР Тетово Т.Ј. од Теарце во својство на лекар пријавил дека бил повикан на интервенција во село Слатино од М.З. од Слатино, Тетово, и без знаци на живот ги пронашол нејзината ќерка К.Ш (36) и неговата внука-доенче во нивниот семеен дом, каде што била констатирана смрт. Постапувајќи по пријавата, обезбедено е местото, каде екипа од СВР Тетово во соработка со јавен обвинител извршила увид и по наредба на обвинител безживотните тела на починатите се предадени на обдукција, додека сопругот Р.Ш. (50) заедно со неговиот малолетен син, ќе бидат пренесени на лекарска помош во тетовската клиничка болница, а потоа лицето Р.Ш. ќе биде приведено во Полициска станица за понатамошно постапување“, пишува во соопштението на МВР.