И на сонце и на дожд и на ветер и на снег, железните огради  на МВР стојат пред Собранието.  Ја чуваат безбедноста на највисокиот законодавен дом и кога има  и кога нема протести.  Заковани во место со изветвена и  излупена боја, искривени и оштетени, стојат во центарот на градот, веднаш спроти паркот „Жена борец“.

Новите генерации пораснаа со нив и најверојатно сметаат дека треба  деноноќно да стојат таму, наредени една до друга. Постарите генерации пак, паметат и едно друго време, дека пред Собранието немаше полициски рампи  нон-стоп, односно дека беа поставувани само  кога имаше протести.

За состојбата со оградите пред собраниската зграда, во Собранието креваат раце. Посочуваат дека за надворешното обезбедување на законодавниот дом е задолжено МВР. „Слободен печат“ го праша  МВР – Зошто полициските огради во изминативе 10 години постојано стојат пред Собранието?

Од МВР неофицијално  посочуваат дека нивната  проценка била дека објектот мора да биде секојдневно обезбедуван, поради протестите.

– Не можат да се ангажираат полицајци за нивно носење и местење бидејќи припадниците на МВР се за чување на редот и мирот во градот. Оградите стојат пред Собранието и од економски причини бидејќи местењето и носењето чини многу. Друго прашање е зошто Собранието и градот се блокира и од 30 протестанти – велат во МВР.

А бројот на официјани посети  на странски државници но и на туристи на метрополата, од ден на ден расте. И првите, при средбите со собранискиот спикер,  и вторите, одблизу ги гледаат рампите.  Туристите од целиот свет најмногу се движат во центарот на Скопје каде се сликаат со спомениците, а најмногу со Никола Карев пред Собранието. А таму заедно со него се и полициски огради. Дали сликите за вечен спомен нема да им бидат потсетник дека биле во држава во која нема сигурност и безбедност? И конечно, дали во пресрет на добивањето на датум за почеток на преговорите со Европската Унија за момент полициските  рампи треба да бидат тргнати за да се почувствуваме и ние конечно како европејци?