Екипите на „Водовод и канализација“ неодамна ги заварија сите шахти на тротоарите и на коловозот по должина на булеварот Партизански одреди. Од претпријатието, на прашањето по чиј налог ги извршиле овие активности, одговорија дека шахтите се заваруваат по наредба на МВР и дека тоа е така со години.

Последно ова е направено на Партизанска, но тоа не е единствен случај.

Во целото централно градско подрачје шахтите се заварени подолго време заради безбедносни причини, вклучувајќи ги и споменатите улица Водњанска, булевар Илинден, пред Собрание – велат од ЈП „Водовод и канализација“.

Дека станува збор за зголемување на безбедноста е јасно штом зад тоа стои Министерството за внатрешни работи. На прашањето до Министерството дали сметаат дека булеварот е небезбеден и за кого, оттаму не одговараат прецизно што ги поттикнало да издадат ваква наредба, но велат дека врз основа на Уредбата за личностите и објектите што се обезбедуваат, видовите мерки и активности и степените на обезбедување, Одделот за заштита на определени личности и објекти при МВР е надлежен за „преземање мерки и активности за противдиверзионо и дефанзивно – електротехничко обезбедување при обезбедување личности под заштита“.

 Од досегашната практика и во согласност со Упатството за примена на безбедносни мерки и активности за обезбедување на определени личности, странски државници, странски и меѓународни делегации во објекти и за време на одржување јавни собири и манифестации, Одделот ги презема горенаведените мерки за обезбедување на просторот каде што се одржуваат јавни манифестации, а воедно и трасите на движење на придружните возила наменети за штитени личности, вклучувајќи го и просторот во должина на булеварот Партизански одреди – велат од Министерството.

Оттаму објаснуваат дека заради исполнување на протоколот за обезбедување штитени личности и странски делегации при движењето од едно место до друго, потребно е преземање мерки и активности за целосно обезбедување на трасата, меѓу кои се опфатени контрола и затворање на шахтите.

За таа цел, доколку е утврдено за потребно, Министерството за внатрешни работи преку соработка со надлежните институции, меѓу кои е и Јавното претпријатие „Водовод“, побарува да преземат мерки, со кои би се овозможило доследно спроведување на правните прописи со кој се регулира горенаведената тематика – прецизираат од МВР.

Заварени шахтите на Партизанска: Чија безбедност штити МВР?

Познато е дека навистина честопати на булеварот Партизански одреди се одржуваат јавни манифестации, а по него повремено се движат и странски делегации, но досега шахтите не беа затворени. Сега безбедноста е издигната на повисоко ниво, веројатно затоа што по булеварот секојдневно се движи премиерот Христијан Мицкоски од и кон својот дом. Од истите причини се заварени и шахтите што се наоѓаат на улицата Водњанска, која води кон резиденцијата на претседателот на државата, но и оние пред двата најважни објекти – Собранието и Владата.

Според Уредбата за личностите и објектите што се обезбедуваат, МВР со редовни, вонредни и посебни мерки и активности постојано ги обезбедува претседателот на Македонија, претседателот на Собранието, премиерот, замениците на премиерот, потоа министрите за внатрешни работи, за одбрана и за надворешни работи, како и директорите на Бирото за јавна безбедност и на Управата за безбедност и контраразузнавање.

Во Уредбата исто така се наведува дека мерките за обезбедување се преземаат за создавање безбедносни услови за непречено одвивање на активностите на овие личности, нивна заштита во објектите каде што престојуваат и при нивното движење до одредена дестинација, како и за обезбедување лична сигурност на другите лица што по разни основи престојуваат во објектите кои се обезбедуваат.

Од аспект на безбедноста, постапката со заварувањето на шахтите е сосема јасна. Нејасно е само како се врши дезинсекција и дератизација во затворените шахти, што е обврска да се прави двапати годишно, за да се спречи размножувањето на глувци и стаорци низ градот.

Доколку, пак, има некој дефект или невреме од поголеми размери, сосема е извесно што ќе направат екипите на јавното претпријатие – ќе ги кршат, а потоа одново ќе ги заваруваат.