Министерството за внатрешни работи поднесе кривична пријава против скопски градоначалник, петмина вработени во скопска општина и правно лице поради „злоупотреба на службена положба“ и „несовесно работење во службата“. Од Општина Карпош преку соопштение „потврдија“ дека станува збор за нивниот градоначалник Стевчо Јакимовски, а кривичната пријава против Јакимовски ја сметаат за тенденциозна, злонамерна и политички мотивирана.

„Имено, стручните служби од општина Карпош предметот за легализација на спортските објекти на Александар Палас со внимание го имаат разгледувано, и истиот е решен согласно законските прописи. Општина Карпош категорично тврди дека легализацијата е законита за овие спортски објекти затоа што за сè за што се издава одобрение за градба, се врши легализација, а за истите објекти правното лице Александар Палас има одобрение за градба од Министерството за транспорт и врски за кое не го спровеле во катастар. Дополнителен аргумент е фактот што за тениски терени изградени на територија на општина Карпош во времето на Никола Груевски е издадено одобрение за градба. Во општина Карпош работат квалитетни искусни службеници кои совесно си ги вршат своите работни обврски и убедени се дека истата кривична пријава ќе биде отфрлена како недопустлива од причини што надлежните општински органи правилно ги утврдиле фактите и извршиле легализација согласно законските прописи кои ги донела Владата на Никола Груевски“, се вели во соопштението на Општина Карпош.

Градоначалник на скопска општина заработи Кривична пријава – овозможил легализација на „диво“ изградени тениски игралишта