Министерот за надворешни работи Тимчо Муцунски, утре во Атина ќе се сретне со шефот на грчката дипломатија, Јоргос Герапетритис, во рамки на својата работна посета на Грција.

Како што соопшти Министерството за надворешни работи, во фокусот на разговорите ќе бидат идните активности за унапредување на билатералните односи, со посебен акцент на економската и енергетската соработка, како и инфраструктурното поврзување меѓу двете земји.

Соговорниците ќе размислуваат и за прашања поврзани со европската интеграција на регионот и актуелните геополитички случувања, со заедничка заложба за зајакнување на регионалната стабилност и просперитет. Како што соопштија од МНР, Македонија и Грција, како непосредни соседи и НАТО-сојузници, имаат заеднички интерес за продлабочување на соработката на повеќе нивоа.