Третманот кон политичките и воените заробеници, незаконски притворените цивили и присилно депортираните деца, биле во фокус на Министерската конференција за хуманата димензија на Формулата за мир на претседателот Зеленски од Украина, што се одржа во Монтреал, Канада.

На конференцијата учествува и министерот за надворешни работи и надворешна трговија, Тимчо Муцунски.

Покрај обраќањето, како што соопштија од Министерството на воведната сесија, министерот Муцунски говорел на сесијата на тема „Механизми за безбедно враќање дома на заробените украински цивили и депортираните деца.“

Во говорот пред присутните тој ja нагласил неопходноста од почитување на принципите на безбедност, соработка и, пред сè, човечко достоинство, потенцирајќи ја итната потреба да се обезбедат безбедни, достоинствени и одржливи патишта за враќање на Украинците раселени од конфликтот, притоа нагласувајќи дека одговорот не смее да биде рамнодушен или со двоумење, туку јасна посветеност на акција.

Муцунски додал дека со заедничка работа и посветеност може да се изградат механизми кои не само што ќе го олеснат безбедното враќање, туку и ќе ги потврдат нашите заеднички вредности на сочувство, солидарност и издржливост

– Нашето учество и посветеност денеска ќе испратат силна порака за тоа како можеме да работиме заедно не само за заштита на човековите права, туку и за да се осигураме дека секое патување кон безбедност и достоинство е почитувано и олеснето – посочил Муцунски.

На маргините на конференцијата, министерот Муцунски остварил билатерални средби со косовската министерка за надворешни работи и дијаспора, Доника Гервала, српската министерка за евроинтеграции, Тања Мишевиќ, и потпретседателот на Европскиот парламент, Николае Штефанута.

Фокусот на средбите, како што соопштија од Министерството, бил ставен на актуелните меѓународни прашања, процесот на евроинтеграција и регионалните теми, вклучително и надворешно-политичките приоритети и состојбите во непосредното опкружување.