Министерот за надворешни работи и надворешна трговија Тимчо Муцунски денеска и утре ќе престојува во Словенија, каде што ќе учествува на Бледскиот стратешки форум.

Во рамките на форумот, како што информираат од неговиот кабинет, Муцунски ќе се обрати на панел-дискусијата на тема „Нема регион за младите – време е за промени“.

„Сесијата ќе ги обедини министрите за надворешни работи и младите експерти од регионот, нудејќи уникатна можност за соочување со предизвиците и разгледување на вистинските потреби за суштинска трансформација“ се вели во соопштението на Министерството.

Муцунски ќе присуствува и на работен појадок со министрите за надворешни работи од регионот, каде што ќе се направи пресек на актуелните состојби и предизвици на Западен Балкан.

На маргините на форумот, предвидени се и повеќе билатерални средби со министри и претставници на меѓународни организации.