Министерот за надворешни работи и надворешна трговија, Тимчо Муцунски денеска во објава на социјалните мрежи ја коментираше изјавата на претседателот СДСМ Венко Филипче во однос на блокирањето предлози за евроинтеграции од страна на премиерот Мицкоски, и тој го обвини Филипче дека е противречен бидејќи од една страна зборува за уставни измени, од друга страна за откажување од преговорите ако има ново вето.

„Од нас нема да слушнете едно пред камера, а друго зад затворени врати. Тоа е суштината на довербата – да бидеме исти и во зборовите и во делата. Тука е и најголемата противречност кај Венко Филипче: од една страна зборува за уставни измени, од друга страна за откажување од преговорите ако има ново вето. Таков пристап не носи сигурност, туку неизвесност за правецот во кој треба да оди државата“, напиша Муцунски.

Тој додаде дека изминатите години народот видел што значи политика на брзи потези и празни ветувања.

„СДС и ДУИ со секое ветување отвораа надеж, а со секој притисок ја поништуваа таа надеж. Заедничките документите што се носеа во Собранието не донесоа сила, туку слабост – беа дерогирани веднаш штом ќе се појавеше предизвик. Нашиот пат е поинаков. Работиме на решенија што носат траен напредок – не на блокади што се повторуваат. Подобро е да покажеме трпение и мудрост, отколку да направиме потег кој утре ќе биде уште поголем товар за државата. Тоа е државнички пристап: да мислиме на денес, на утре и на задутре. Има уште една важна разлика. За нас европската иднина не е празна фраза – таа значи борба против корупцијата, модерна администрација, дигитализација, инвестиции во патишта, инфраструктура и нови можности за граѓаните. Ние веруваме дека резултатите дома создаваат почит надвор“, посочи тој.

Муцунски додаде дека токму затоа биле решени да обезбедат европска иднина која ќе биде достојна, одржлива и прифатлива за сите, бидејќи тоа го заслужува македонскиот народ.