Хрватското специјално обвинителство за сузбивање на корупција и организиран криминал поднесе обвинение против пејачот Тони Цетински бидејќи користел лажен сертификат за вакцинација против коронавирусот, објави веб-страницата „Империјал“.

Според нивните сознанија, од документите кои ги објавија, заменик-обвинителот Вјекослав Шаулиќ испратил обвинение против 18 лица, меѓу кои и познатиот пејач, до Жупанискиот суд во Загреб на 28 декември 2023 година.

Всушност, се работи за ново обвинение, во кое лицата се обвинети дека платиле за да добијат лажни потврди дека се вакцинирани против коронавирусот и со тоа да се стекнат со право на дигитална ЕУ-пропусница за ковид-19. Наводно, обвинетите му дале пари на посредникот Иван Џелалија, со цел медицинската сестра Петра Румиха, која во тој период работела во Здравствениот дом во Загреб и била овластена да внесува податоци во информацискиот систем на Министерството за здравство, лажно да внесе информации дека обвинетите биле вакцинирани.

Интересно е дека, според обвинението, посредникот за таа незаконска услуга добивал различни суми на пари, па некои од обвинетите му платиле сума од 265 евра, некои 200, а некои 100 евра. Обвинетите се бранеле на различни начини – некои го негирале делото, некои веднаш го признале, а има и такви кои пружиле отпор затоа што постојано морале да плаќаат скапи тестови.

Како што пишува во текстот на „Империјал“, обвинението против гореспоменатите било испратено до Жупанискиот суд во Загреб пред почетокот на 2024 година, но дека на повеќето од обвинетите им било врачено деновиве.

Во изјава за „Курир“, преку неговиот претставник за јавноста, Тони Цетински рече дека не знае ништо за ова.