Повеќе стотици килограми небезбедна храна од летово наваму уништија инспекциските служби на Агенцијата за храна и ветеринарство, но на трговците и на угостителите не им доаѓа умот. Во Кавадарци „пленот“ беше 87 килограми (месо, замрзнати производи и риба), во Битола беше затекната небезбедна храна во количество од 40 килограми, во Скопје 670 килограми, во Охрид 10,7 килограми смеса за мелено месо, во Куманово беа откриени над 100 килограми производи подготвени за скара, а идентично количество чипсови, чоколадни бонбони, наполитанки, конзерви со месен нарезок, кроасани и други производи, без запленети бидејќи биле со поминат рок на употреба и без познато потекло и на скопскиот бувјак.

Иако е најстрого забрането, на трговците и на угостителите им е најлесно да ја фрлаат ваквата храна во контејнер, а јавна тајна е дека дел од небезбедните производи повторно завршуваат во сивата зона, па дури и јавно се продаваат на зелените пазари.

– Апелираме до граѓаните да бидат свесни и одговорни потрошувачи и храна да купуваат исклучиво од одобрени/регистрирани оператори од АХВ кои се под надзор на инспекциските служби на Агенцијата, бидејќи производите што се продаваат на диво, од нерегистрирани оператори, најчесто од физички лица може да бидат небезбедни – предупредуваат од АХВ.

Но и покрај сите контроли и заплени, на граѓаните не им е јасно како храната со поминат рок повторно се враќа на улиците (и тоа буквално), а уште понејасно е како дел од нив ги купуваат, кога на нив се гледа дека рокот на траење е избришан и прелепен со нов датум!?

– Операторите со храна имаат обврска да склучат договор со јавно комунално претпријатие за транспорт и нештетно уништувањеахв небезбедна храна и за тоа да ја известат Агенцијата за храна и ветеринарство бидејќи тие ја имаат примарната одговорност за безбедноста на храната. До Агенцијата за храна и ветеринарство, Одделение за заштита на потрошувачите досега не е поднесена пријава од граѓани за фрлање на небезбедна храна во контејнери од страна на операторите – велат од АХВ за „Слободен печат“.

Рокот на употреба мора да биде јасно назначен во декларациите на производите и граѓаните мора да внимаваат што и каде купуваат, велат од Организацијата на потрошувачите за нашиот весник.

– Во последно време граѓаните се жалат дека квалитетот и на производите што имаат важечки рок на траење, не е соодветен. Тоа може да значи дека нешто не штима дури и во производството, бидејќи недозволиво е тазе производ да не мириса убаво, јогуртот да режи, а во трајното млеко да има грутчиња – забележуваат во ОПМ.

Оттаму, апелираат граѓаните да ги чуваат фискалните сметки и веднаш да реагираат до трговците.

Европол: антидатирањето е криминална практика што зема замав

Промената на датумите на производите на кои им истекол рокот и повторното ставање на пазарот и нивна продажба преку малопродажните синџири е релативно нова криминална практика што зема замав, предупредува Европол втора година по ред. Поради овие махинации, минатата година во неколку земји од ЕУ беа уапсени 27 лица, кои учествуваа во овој синџир на измами. Во последната акција на Европол, во повеќе европски земји се запленети околу 22.000 тони храна и 850.000 литри пијалаци, главно алкохолни пијалаци чии етикети се фалсификувани.

Официјално беше објавено дека се откриени 11 криминални мрежи, а издадени се 104 потерници. Со инфилтрирање во компаниите за депонирање отпад, осомничените за измама набавиле големи количества храна со поминат рок што требало да се уништи. Како ја извршиле измамата? Според деталите од истрагата, прво хемиски ги бришеле роковите на одредени артикли, по што ќе пишувале нови.

Подоцна, како што се сомнева, фалсификувале и декларации и ставале сосема нови за да бидат уште посигурни дека потрошувачите нема да забележат дека не купуваат свежа храна. Европол тогаш предупреди дека таквата храна и пијалаци не само што можат да имаат непријатен вкус и мирис, туку таквата храна може да биде исклучително опасна за човечка исхрана и може да претставува сериозен ризик за јавното здравје, објави „Политика.рс“.