Поранешниот тапанар на „Бијело дугме“, Милиќ Вукашиновиќ (73) се огласи откако неодамна итно беше примен во болница поради аневризма.

Тој се вклучил на емисијата „Премиера – Викенд специјал“ и раскажал дека го чека операција.

„Во моментов сум во тоалет, пушам бидејќи тоа е единственото место каде што можете да пушите. Јас сум на Ургентно, во кардиоваскуларната клиника. Чекам операција. Сега имам уште скенирање на белите дробови и срцето. Направив сè останато“, рекол тој.

Вукашиновиќ додал дека ова трае веќе 15 дена и дека сè уште има страшни болки во левата нога, од коленото до стапалото.

Вели дека веќе половина година има оток за кој мислел дека е само масно ткиво.

„Поради огромните болки сепак ја послушав сопругата Сузана, која ме молеше да одам на лекар да видам што е работата со отокот. Отидовме, човекот ми ја гледаше ногата. Му реков: ‘Па, тоа е масно ткиво’.

Човекот се шокираше, ми рече: ‘Тоа не е масно ткиво, туку аневризма зголемена три, четири пати. Таа ти притискала некои нерви, затоа долу те боли ногата. Веднаш оттука оди на Ургентно, побарај операција, бидејќи ако пукне таа зголемена аневризма, можеш да умреш за две минути’“, објаснил Вукашиновиќ.

Музичарот додал дека неговата состојба е стабилна, но дека болката во ногата трае цел ден и дека тоа му е неподносливо.