Ракетните инженери или неврохирурзите вообичаено се синоним за најбистрите умови, но ново истражување покажува дека луѓето што се на овие професии не се ништо попаметни од просечниот човек.

Од вкупно 329 аеронаутички инженери и 72 неврохирурзи во Обединетото Кралство било побарано да спроведат 12 задачи од шест области „Големиот британски тест за интелигенција“, за испитување на способностите за паметење, внимание и управување со емоции. Резултатите, објавени во „Британскиот медицински журнал“, покажуваат дека нивните способности незначително се разликуваат од просекот на 18.000 луѓе од други професии што го направиле истиот тест.

Авторите на истражувањето истакнуваат дека оваа споредба би можела да поттикне повеќе луѓе да се решат да учат за аеронаутичари или хирурзи, професии што се сметаат за дефицитарни во Британија.

Резултатите покажале дека неврохирурзите имаат значително повисоки способности од ракетните научници при решавање семантички проблеми. Инженерите, пак, покажале подобри резултати на тестовите за концентрација и за решавање задачи за ментална манипулација. Хирурзите побрзо ги решавале проблемите, но имале послаба меморија. Вкупниот резултат бил речиси изедначен.

Заклучокот на студијата е дека „и неврохирурзите и аеронаутичките инженери мошне веројатно не треба да бидат поставени на интелектуален пијадестал. На него треба да има место и за други професионалци“.

– Секој има посебни вештини, некои луѓе се подобри во нешто, а други во нешто друго, а многу е тешко да се биде подобар во сите задачи – вели неврохирургот Асвин Чари, еден од авторите на студијата.