Западните новински агенции наведуваат дека Русија преговара со Хутите за испорака на противбродски крстосувачки ракети „П-800 Оникс“ (во извозната верзија „Јахонт“), како одговор на западното вооружување на Киев со ракети со долг дострел.

Воени експерти сметаат дека одлуката за испорака на руски ракети на Хутите е поврзана со ставот на западните земји кои разговараат за можноста да и дозволат на Украина да гаѓа цели со долг дострел длабоко во Руската Федерација.

„Јахонт“ се смета за една од најнапредните противбродски ракети во светот, пишува српска „Политика“.

Системот е дизајниран да лета преку површината на морето со двојно поголема брзина од звукот, избегнувајќи радари и водени мини.

Како што наведува медиумот ракетите П-800 Оникс се со дострел од околу 300 километри каде според експертите ќе им овозможат на Хутите попрецизно да ги таргетираат комерцијалните бродови во Црвеното Море и да ја зголемат заканата за американските и европските воени бродови кои ги штитат во исто време.

За ова предупреди летово и официјален Кремљ велејќи дека не може да се остане без последици по одлуките на Западот да му се даде дозвола на Киев да користи оружје за напади длабоко на руска територија.

За ова алармираше и самиот Путин кој потоа праша зошто некој мисли дека има право да испорачува такво оружје да се користи за напад на руска територија и дека Русија нема исто право да испорачува иста класа оружје на силите кои во другите региони на светот напаѓаат чувствителни објекти на тие земји што го прават ова против Русија?

„Значи, одговорот би можел да биде асиметричен. Ќе размислиме за ова“, им рекол Путин на западните стратези.

Очигледно, рускиот претседател не би дал таква јавна изјава доколку руската страна веќе немаше елаборирана стратегија за ваков вид одговор кон Западот.

Голем број руски воени аналитичари ја навестија можноста руските „Искандери“ некако одеднаш да се најдат во пустинскиот песок на Арапскиот Полуостров. Тоа практично би значело дека Хутите или некои други воени формации како Хезболах добиваат ракети со долг дострел со кои можат да гаѓаат бродови и авиони во регионот. Тоа практично значи дека ниту еден воен објект, база, воен брод или авион не би биле безбедни на Блискиот Исток.

Според западни извори, Москва со посредство на Иран веќе води тајни преговори со јеменските Хути.

Според овие извори, претставниците на Москва и Хутите се сретнале најмалку двапати во Техеран, а во наредните недели се очекуваат уште средби.

Портпаролот на Хутите, Мохамед Абдел Салам, на прашањето на новинарите за разговорите за ракетите, рече дека „нема поим“ за тоа.