Рускиот министер за надворешни работи Сергеј Лавров денес изјави дека, покрај тоа што Киев ѝ предаде на Москва список со имиња на деца кои треба да бидат обединети со своите семејства во Украина, Русија подготвува и список со имиња на деца кои бара да бидат вратени од Украина на нивните семејства во Русија.

„Канцеларијата на комесарот за правата на децата при претседателот на Руската Федерација подготвува контра-список кој ќе биде предаден на Киев. Прелиминарно содржи (имиња на) десет деца во Украина и осум малолетници во европските земји. Очекуваме дека украинската страна одговорно ќе пристапи кон нашиот список и дека децата ќе бидат обединети со своите роднини во Русија“, рече Лавров во интервју за унгарскиот весник „Маѓар Немзет“, објави РИА Новости .

Лавров потсети дека Русија добила од Украина список со имиња на 339 деца кои, според него, го изгубиле контактот со своите родители или законски застапници, а за кои Киев бара да бидат вратени на своите семејства во Украина.